ತನ್ತ್ರಚೂಡಾಮಣೌ ಪೀಠನಿರ್ಣಯಃ ಅಥವಾ ಶಕ್ತಿಪೀಠಾನಿ

ಈಶ್ವರ ಉವಾಚ ।
ಮಾತಃ ಪರಾತ್ಪರೇ ದೇವಿ ಸರ್ವಜ್ಞಾನಮಯೀಶ್ವರಿ ।
ಕಥ್ಯತಾಂ ಮೇ ಸರ್ವಪೀಠಶಕ್ತಿಭೈರವದೇವತಾಃ ॥ 1॥

ದೇವ್ಯುವಾಚ ।
ಶೃಣು ವತ್ಸ ಪ್ರವಕ್ಷ್ಯಾಮಿ ದಯಾಲ ಭಕ್ತವತ್ಸಲ ।
ಯಾಭಿರ್ವಿನಾ ನ ಸಿಧ್ಯನ್ತಿ ಜಪಸಾಧನಸತ್ಕ್ರಿಯಾಃ ॥ 2॥

ಪಂಚಾಶದೇಕಪೀಠಾನಿ ಏವಂ ಭೈರವದೇವತಾಃ ।
ಅಂಗಪ್ರತ್ಯಂಗಪಾತೇನ ವಿಷ್ಣುಚಕ್ರಕ್ಷತೇನ ಚ ॥ 3॥

ಮಮಾದ್ಯವಪುಷೋ ದೇವ ಹಿತಾಯ ತ್ವಯಿ ಕಥ್ಯತೇ । ಮಮಾನ್ಯವಪುಷೋ
ಬ್ರಹ್ಮರನ್ಧ್ರಂ ಹಿಂಗುಲಾಯಾಂ ಭೈರವೋ ಭೀಮಲೋಚನಃ ॥ 4॥

ಕೋಟ್ಟರೀ ಸಾ ಮಹಾದೇವ ತ್ರಿಗುಣಾ ಯಾ ದಿಗಮ್ಬರೀ ।
ಕರವೀರೇ ತ್ರಿನೇತ್ರಂ ಮೇ ದೇವೀ ಮಹಿಷಮರ್ದಿನೀ ॥ 5॥

ಕ್ರೋಧೀಶೋ ಭೈರವಸ್ತತ್ರ ಸರ್ವಸಿದ್ಧಿಪ್ರದಾಯಕಃ ।
ಸುಗನ್ಧಾಯಾಂ ನಾಸಿಕಾ ಮೇ ದೇವಸ್ತ್ರ್ಯಮ್ಬಭೈರವಃ ॥ 6॥

ಸುನ್ದರೀ ಸಾ ಮಹಾದೇವೀ ಸುನನ್ದಾ ತತ್ರ ದೇವತಾ ।
ಕಾಶ್ಮೀರೇ ಕಂಠದೇಶಂಚ ತ್ರಿಸನ್ಧ್ಯೇಶ್ವರಭೈರವಃ ॥ 7॥

ಮಹಾಮಾಯಾ ಭಗವತೀ ಗುಣಾತೀತಾ ವರಪ್ರದಾ ।
ಜ್ವಾಲಾಮುಖ್ಯಾಂ ತಥಾ ಜಿಹ್ವಾ ದೇವ ಉನ್ಮತ್ತಭೈರವಃ ॥ 8॥

ಅಮ್ಬಿಕಾ ಸಿದ್ಧಿದಾನಾಮ್ನೀ ಸ್ತನಂ ಜಾಲನ್ಧರೇ ಮಮ ।
ಭೀಷಣೋ ಭೈರವಸ್ತತ್ರ ದೇವೀ ತ್ರಿಪುರಮಾಲಿನೀ ॥ 9॥

ಹಾರ್ದಪೀಠಂ ವೈದ್ಯನಾಥೇ ವೈದ್ಯನಾಥಸ್ತು ಭೈರವಃ ।
ದೇವತಾ ಜಯದುರ್ಗಾಖ್ಯಾ ನೇಪಾಲೇ ಜಾನು ಮೇ ಶಿವ ॥ 10॥

ಕಪಾಲೀ ಭೈರವಃ ಶ್ರೀಮಾನ್ ಮಹಾಮಾಯಾ ಚ ದೇವತಾ ।
ಮಾನಸೇ ದಕ್ಷಹಸ್ತೋ ಮೇ ದೇವೀ ದಾಕ್ಷಾಯಣೀ ಹರ ॥ 11॥

ಅಮರೋ ಭೈರವಸ್ತತ್ರ ಸರ್ವಸಿದ್ಧಿಪ್ರದಾಯಕಃ ।
ಉತ್ಕಲೇ ನಾಭಿದೇಶಂಚ ವಿರಜಾಕ್ಷೇತ್ರಮುಚ್ಯತೇ ॥ 12॥

ವಿಮಲಾ ಸಾ ಮಹಾದೇವೀ ಜಗನ್ನಾಥಸ್ತು ಭೈರವಃ ।
ಗಂಡಕ್ಯಾಂ ಗಂಡಪಾತಂಚ ತತ್ರ ಸಿದ್ಧಿರ್ನ ಸಂಶಯಃ ॥ 13॥

ತತ್ರ ಸಾ ಗಂಡಕೀ ಚಂಡೀ ಚಕ್ರಪಾಣಿಸ್ತು ಭೈರವಃ ।
ಬಹುಲಾಯಾಂ ವಾಮಬಾಹುರ್ಬಹುಲಾಖ್ಯಾ ಚ ದೇವತಾ ॥ 14॥

ಭೀರುಕೋ ಭೈರವಸ್ತತ್ರ ಸರ್ವಸಿದ್ಧಿಪ್ರದಾಯಕಃ ।
ಉಜ್ಜಯಿನ್ಯಾಂ ಕೂರ್ಪರಂಚ ಮಾಂಗಲ್ಯ ಕಪಿಲಾಮ್ಬರಃ ॥ 15॥

ಭೈರವಃ ಸಿದ್ಧಿದಃ ಸಾಕ್ಷಾದ್ದೇವೀ ಮಂಗಲಚಂಡಿಕಾ ।
ಚಟ್ಟಲೇ ದಕ್ಷಬಾಹುರ್ಮೇ ಭೈರವಂಚನ್ದ್ರಶೇಖರಃ ॥ 16॥

ವ್ಯಕ್ತರೂಪಾ ಭಗವತೀ ಭವಾನೀ ಯತ್ರ ದೇವತಾ ।
ವಿಶೇಷತಃ ಕಲಿಯುಗೇ ವಸಾಮಿ ಚನ್ದ್ರಶೇಖರೇ ॥ 17॥

ತ್ರಿಪುರಾಯಾಂ ದಕ್ಷಪಾದೋ ದೇವೀ ತ್ರಿಪುರಸುನ್ದರೀ ।
ಭೈರವಸ್ತ್ರಿಪುರೇಶಂಚ ಸರ್ವಾಭೀಷ್ಟಪ್ರದಾಯಕಃ ॥ 18॥

ತ್ರಿಸ್ರೋತಾಯಾಂ ವಾಮಪಾದೋ ಭ್ರಾಮರೀ ಭೈರವೇಶ್ವರಃ ।
ಯೋನಿಪೀಠಂ ಕಾಮಗಿರೌ ಕಾಮಾಖ್ಯಾ ತತ್ರ ದೇವತಾ ॥ 19॥

ಯತ್ರಾಸ್ತೇ ತ್ರಿಗುಣಾತೀತಾ ರಕ್ತಪಾಷಾಣರೂಪಿಣೀ ।
ಯತ್ರಾಸ್ತೇ ಮಾಧವಃ ಸಾಕ್ಷಾದುಮಾನನ್ದೋsಥ ಭೈರವಃ ॥ 20॥

ಸರ್ವದಾ ವಿಹರೇದ್ದೇವೀ ತತ್ರ ಮುಕ್ತಿರ್ನ ಸಂಶಯಃ ।
ತತ್ರ ಶ್ರೀಭೈರವೀ ದೇವೀ ತತ್ರ ಚ ಕ್ಷೇತ್ರದೇವತಾ ॥ 21॥

ಪ್ರಚಂಡಚಂಡಿಕಾ ತತ್ರ ಮಾತಂಗೀ ತ್ರಿಪುರಾಮ್ಬಿಕಾ ।
ವಗಲಾ ಕಮಲಾ ತತ್ರ ಭುವನೇಶೀ ಸಧೂಮಿನೀ ॥ 22॥

ಏತಾನಿ ಪರಪೀಠಾನಿ ಶಂಸನ್ತಿ ವರಭೈರವಾಃ ।
ಏವಂ ತು ದೇವತಾಃ ಸರ್ವಾ ಏವಂ ತು ದಶ ಭೈರವಾಃ ॥ 23॥

ಸರ್ವತ್ರ ವಿರಲಾ ಚಾಹಂ ಕಾಮರೂಪೇ ಗೃಹೇ ಗೃಹೇ ।
ಗೌರಿ ಶಿಖರಮಾರುಹ್ಯ ಪುನರ್ಜನ್ಮ ನ ವಿದ್ಯತೇ ॥ 24॥

ಕರತೋಯಾಂ ಸಮಾರಮ್ಯ ಯಾವದ್ದಿಕ್ಕರವಾಸಿನೀಮ್ ।
ಶತಯೋಜನವಿಸ್ತೀರ್ಣಂ ತ್ರಿಕೋಣಂ ಸರ್ವಸಿದ್ಧಿದಮ್ ।
ದೇವಾ ಮರಣಮಿಚ್ಛನ್ತಿ ಕಿಂ ಪುನರ್ಮಾನವಾದಯಃ ॥ 25॥

ಕ್ಷೀರಗ್ರಾಮೇ ಮಹಾಮಾಯಾ ಭೈರವಃ ಕ್ಷೀರಖಂಡಕಃ ।
ಯುಗದ್ಯಾ ಸಾ ಮಹಾಮಾಯಾ ದಕ್ಷಾಂಗುಷ್ಠಂ ಪದೋ ಮಮ ॥ 26॥

ನಕುಲೀಶಃ ಕಾಲೀಪೀಠೇ ದಕ್ಷಪಾದಾಂಗುಲೀ ಚ ಮೇ ।
ಸರ್ವಸಿದ್ಧಿಕರೀ ದೇವೀ ಕಾಲಿಕಾ ತತ್ರ ದೇವತಾ ॥ 27॥

ಅಂಗುಲೀವೃನ್ದಂ ಹಸ್ತಸ್ಯ ಪ್ರಯಾಗೇ ಲಲಿತಾ ಭವಃ ।
ಜಯನ್ತ್ಯಾಂ ವಾಮಜಂಘಾ ಚ ಜಯನ್ತೀ ಕ್ರಮದೀಶ್ವರಃ ॥ 28॥

ಭುವನೇಶೀ ಸಿದ್ಧಿರೂಪಾ ಕಿರೀಟಸ್ಥಾ ಕಿರೀಟತಃ
ದೇವತಾ ವಿಮಲಾ ನಾಮ್ನೀ ಸಂವರ್ತ್ತೋ ಭೈರವಸ್ತಥಾ ॥ 29॥

ವಾರಾಣಸ್ಯಾಂ ವಿಶಾಲಾಕ್ಷೀ ದೇವತಾ ಕಾಲಭೈರವಃ ।
ಮಣಿಕರ್ಣೀತಿ ವಿಖ್ಯಾತಾ ಕುಂಡಲಂ ಚ ಮಮ ಶ್ರುತೇಃ ॥ 30॥

ಕನ್ಯಾಶ್ರಮೇ ಚ ಪೃಷ್ಠಂ ಮೇ ನಿಮಿಷೋ ಭೈರವಸ್ತಥಾ ।
ಸರ್ವಾಣೀ ದೇವತಾ ತತ್ರ ಕುರುಕ್ಷೇತ್ರೇ ಚ ಗುಲ್ಫತಃ ॥ 31॥

ಸ್ಥಾಣುರ್ನಾಮ್ನಾ ಚ ಸಾವಿತ್ರೀ ದೇವತಾ ಮಣಿವೇದಕೇ ।
ಮಣಿಬನ್ಧೇ ಚ ಗಾಯತ್ರೀ ಸರ್ವಾನನ್ದಸ್ತು ಭೈರವಃ ॥ 32॥

ಶ್ರೀಶೈಲೇ ಚ ಮಮ ಗ್ರೀವಾ ಮಹಾಲಕ್ಷ್ಮೀಸ್ತು ದೇವತಾ ।
ಭೈರವಃ ಸಮ್ಬರಾನನ್ದೋ ದೇಶೋ ದೇಶೋ ವ್ಯವಸ್ಥಿತಃ ॥ 33॥

ಕಾಂಚೀದೇಶೋ ಚ ಕಂಕಾಲೋ ಭೈರವೋ ರುರುನಾಮಕಃ ।
ದೇವತಾ ದೇವಗರ್ಭಾಖ್ಯಾ ನಿತಮ್ಬಃ ಕಾಲಮಾಧವೇ ॥ 34॥

ಭೈರವಶ್ಚಾಸಿತಾಂಗಶ್ಚ ದೇವೀ ಕಾಲೀ ಸುಸಿದ್ಧಿದಾ ।
ದೃಷ್ಟಾ ದೃಷ್ಟಾ ನಮಸ್ಕೃತ್ಯ ಮನ್ತ್ರಸಿದ್ಧಿಮವಾಪ್ನುಯಾತ್ ॥ 35॥

ಕುಜವಾರೇ ಭೂತತಿಥೌ ನಿಶಾರ್ದ್ಧೇ ಯಸ್ತು ಸಾಧಕಃ ।
ನತ್ವಾ ಪ್ರದಕ್ಷಿಣೀಕೃತ್ಯ ಮನ್ತ್ರಸಿದ್ಧಿಮವಾಪ್ನುಯಾತ್ ॥ 36॥

ಶೋಣಾಖ್ಯಾ ಭದ್ರಸೇನಸ್ತು ನರ್ಮದಾಖ್ಯೇ ನಿತಮ್ಬಕಃ ।
ರಾಮಗಿರೌ ಸ್ತನಾನ್ಯಂಚ ಶಿವಾನೀ ಚಂಡಭೈರವಃ ॥ 37॥

ವೃನ್ದಾವನೇ ಕೇಶಜಾಲಮುಮಾ ನಾಮ್ನೀ ಚ ದೇವತಾ ।
ಭೂತೇಶೋ ಭೈರವಸ್ತತ್ರ ಸರ್ವಸಿದ್ಧಿಪ್ರದಾಯಕಃ ॥ 38॥

ಸಂಹಾರಾಖ್ಯ ಊರ್ದ್ಧದನ್ತೋ ದೇವೀಽನಲೇ ನಾರಾಯಣೀ ಶ್ರುಚೌ ।
ಅಧೋದನ್ತೋ ಮಹಾರುದ್ರೋ ವಾರಾಹೀ ಪಂಚಸಾಗರೇ ॥ 39॥

ಕರತೋಯಾತಟೇ ಕರ್ಣೇ ವಾಮೇ ವಾಮನಭೈರವಃ ।
ಅಪರ್ಣಾ ದೇವತಾ ಯತ್ರ ಬ್ರಹ್ಮರೂಪಾಕರೋದ್ಭವಾ ॥ 40॥

ಶ್ರೀಪರ್ವತೇ ದಕ್ಷಗುಲ್ಫಸ್ತತ್ರ ಶ್ರೀಸುನ್ದರೀ ಪರಾ ।
ಸರ್ವಸಿದ್ಧೀಶ್ವರೀ ಸರ್ವಾ ಸುನ್ದರಾನನ್ದಭೈರವಃ ॥ 41॥

ಕಪಾಲಿನೀ ಭೀಮರೂಪಾ ವಾಮಗುಲ್ಫೋ ವಿಭಾಷಕೇ ।
ಭೈರವಶ್ಚ ಮಹಾದೇವ ಸರ್ವಾನನ್ದಃ ಶುಭಪ್ರದಃ ॥ 42॥

ಉದರಂಚ ಪ್ರಭಾಸೇ ಮೇ ಚನ್ದ್ರಭಾಗಾ ಯಶಸ್ವಿನೀ ।
ವಕ್ರತುಂಡೋ ಭೈರವ ಊರ್ಧ್ವೋಷ್ಠೋ ಭೈರವಪರ್ವತೇ ॥ 43॥

ಅವನ್ತೀ ಚ ಮಹಾದೇವೀ ಲಮ್ಬಕರ್ಣಸ್ತು ಭೈರವಃ ॥ 44॥

ಚಿವುಕೇ ಭ್ರಾಮರೀ ದೇವೀ ವಿಕೃತಾಕ್ಷೋ ಜನಸ್ಥಾನೇ ।
ಗಂಡೋ ಗೋದಾವರೀತೀರೇ ವಿಶ್ವೇಶೀ ವಿಶ್ವಮಾತೃಕಾ ॥ 45॥

ದಂಡಪಾಣಿಭೈರವಸ್ತು ವಾಮಗಂಡೇ ತು ರಾಕಿಣೀ ।
ಭೈರವೋ ವತ್ಸನಾಭಸ್ತು ತತ್ರ ಸಿದ್ಧಿರ್ನ ಸಂಶಯಃ ॥ 46॥

ರತ್ನಾವಲ್ಯಾಂ ದಕ್ಷಸ್ಕನ್ಧಃ ಕುಮಾರೀ ಭೈರವಃ ಶಿವಃ ।
ಮಿಥಿಲಾಯಾಮುಮಾ ದೇವೀ ವಾಮಸ್ಕನ್ಧೋ ಮಹೋದರಃ ॥ 47॥

ನಲಾಹಾಟ್ಯಾಂ ನಲಾಪಾತೋ ಯೋಗೀಶೋ ಭೈರವಸ್ತಥಾ ।
ತತ್ರ ಸಾ ಕಾಲಿಕಾ ದೇವೀ ಸರ್ವಸಿದ್ಧಿಪ್ರದಾಯಿಕಾ ॥ 48॥

ಕಾಲೀಘಾಟೇ ಮುಂಡಪಾತಃ ಕ್ರೋಧೀಶೋ ಭೈರವಸ್ತಥಾ ।
ದೇವತಾ ಜಯದುರ್ಗಾಖ್ಯಾ ನಾನಾಭೋಗಪ್ರದಾಯಿನೀ ॥ 49॥

ವಕ್ರೇಶ್ವರೇ ಮನಃಪಾತೋ ವಕ್ರನಾಥಸ್ತು ಭೈರವಃ ।
ನದೀ ಪಾಪಹರಾ ತತ್ರ ದೇವೀ ಮಹಿಷಮರ್ದಿನೀ ॥ 50॥

ಯಶೋರೇ ಪಾಣಿಪದ್ಮಂಚ ದೇವತಾ ಯಶೋರೇಶ್ವರೀ ।
ಚಂಡಶ್ಚ ಭೈರವೋ ಯತ್ರ ತತ್ರ ಸಿದ್ಧಿರ್ನ ಸಂಶಯ ॥ 51॥

ಅಟ್ಟಹಾಸೇ ಚೋಷ್ಠಪಾತೋ ದೇವೀ ಸಾ ಫುಲ್ಲರಾ ಸ್ಮೃತಾ ।
ವಿಶ್ವೇಶೋ ಭೈರವಸ್ತತ್ರ ಸರ್ವಾಭೀಷ್ಟಪ್ರದಾಯಕಃ ॥ 52॥

ಹಾರಪಾತೋ ನನ್ದಿಪುರೇ ಭೈರವೋ ನನ್ದಿಕೇಶ್ವರಃ ।
ನನ್ದಿನೀ ಸಾ ಮಹಾದೇವೀ ತತ್ರ ಸಿದ್ಧಿಮವಾಪ್ನುಯಾತ್ ॥ 53॥

ಲಂಕಾಯಾಂ ನೂಪುರಂಚೈವ ಭೈರವೋ ರಾಕ್ಷಸೇಶ್ವರಃ ।
ಇನ್ದ್ರಾಕ್ಷೀ ದೇವತಾ ತತ್ರ ಇನ್ದ್ರೇಣೋಪಾಸಿತಾ ಪುರಾ ॥ 54॥

ವಿರಾಟದೇಶಮಧ್ಯೇ ತು ಪಾದಾಂಗುಲಿನಿಪಾತನಮ್ ।
ಭೈರವಶ್ಚಾಮೃತಾಖ್ಯಶ್ಚ ದೇವೀ ತತ್ರಾಮ್ಬಿಕಾ ಸ್ಮೃತಾ ॥ 55॥

ಮಾಗಧೇ ದಕ್ಷಜಂಘಾ ಮೇ ವ್ಯೋಮಕೇಶಸ್ತು ಭೈರವಃ ।
ಸರ್ವಾನನ್ದಕರೀ ದೇವೀ ಸರ್ವಾನನ್ದಫಲಪ್ರದಾ ॥ 56॥

ಏತಾಸ್ತೇ ಕಥಿತಾಃ ಪುತ್ರ ಪೀಠನಾಥಾಧಿದೇವತಾಃ ।
ಕ್ಷೇತ್ರಾಧಿಪಂ ವಿನಾ ದೇವ ಪೂಜಯೇತ್ ಪೀಠದೇವತಾಮ್ ॥ 57॥

ಭೈರವೈರ್ಹ್ರಯತೇ ಸರ್ವಂ ಜಪಪೂಜಾದಿಸಾಧನಮ್ ।
ಅಜ್ಞಾತ್ವಾ ಭೈರವಂ ಪೀಠೇ ಪೀಠಶಕ್ತಿತಂಚ ಶಂಕರ ॥ 58॥

ಪ್ರಾಣನಾಥ ನ ಸಿಧ್ಯೇತ್ತು ಕಲ್ಪಕೋಟಿ ಜಪಾದಿಭಿಃ ।
ನ ದೇಯಂ ಪರಶಿಷ್ಯಾಯ ನಿನ್ದಕಾಯ ದುರಾತ್ಮನೇ ॥ 59॥

ಶಠಾಯ ಕ್ರೂರಕಾರ್ಯಾಯ ದತ್ವಾ ಮೃತ್ಯುಮವಾಪ್ನುಯಾತ್ ।
ದದ್ಯಾಚ್ಛಾನ್ತಾಯ ಶಿಷ್ಯಾಯ ನಿಷ್ಠಿಕಾಯ ಶುಚೌ ಪ್ರಿಯೇ ।
ಸಾಧಕಾಯ ಕುಲೀನಾಯ ಮನ್ತ್ರೀ ಮನ್ತ್ರಾರ್ಥಸಿದ್ಧಯೇ ॥ 60॥

ಇತಿ ತನ್ತ್ರಚೂಡಾಮಣೌ ಶಿವಪಾರ್ವತೀಸಂವಾದೇ ಏಕಪsಚಾಶದ್ವಿದ್ಯೋಪತ್ತೌ
ಪೀಠನಿರ್ಣಯಃ ಸಮಾಪ್ತಃ ಅತಹ್ವಾ ಶಕ್ತಿಪೀಠನಾಮಾನಿ ಸಮಾಪ್ತಾ ।