ಓಂ ನಮೋ ನಾರಾಯಣಾಯ ಅಷ್ಟಾಕ್ಷರಮಾಹಾತ್ಮ್ಯಂ

ಶ್ರೀಶುಕ ಉವಾಚ --
ಕಿಂ ಜಪನ್ ಮುಚ್ಯತೇ ತಾತ ಸತತಂ ವಿಷ್ಣುತತ್ಪರಃ ।
ಸಂಸಾರದುಃಖಾತ್ ಸರ್ವೇಷಾಂ ಹಿತಾಯ ವದ ಮೇ ಪಿತಃ ॥ 1॥

ವ್ಯಾಸ ಉವಾಚ --
ಅಷ್ಟಾಕ್ಷರಂ ಪ್ರವಕ್ಷ್ಯಾಮಿ ಮನ್ತ್ರಾಣಾಂ ಮನ್ತ್ರಮುತ್ತಮಮ್ ।
ಯಂ ಜಪನ್ ಮುಚ್ಯತೇ ಮರ್ತ್ಯೋ ಜನ್ಮಸಂಸಾರಬನ್ಧನಾತ್ ॥ 2॥

ಹೃತ್ಪುಂಡರೀಕಮಧ್ಯಸ್ಥಂ ಶಂಖಚಕ್ರಗದಾಧರಮ್ ।
ಏಕಾಗ್ರಮನಸಾ ಧ್ಯಾತ್ವಾ ವಿಷ್ಣುಂ ಕುರ್ಯಾಜ್ಜಪಂ ದ್ವಿಜಃ ॥ 3॥

ಏಕಾನ್ತೇ ನಿರ್ಜನಸ್ಥಾನೇ ವಿಷ್ಣವಗ್ರೇ ವಾ ಜಲಾನ್ತಿಕೇ ।
ಜಪೇದಷ್ಟಾಕ್ಷರಂ ಮನ್ತ್ರಂ ಚಿತ್ತೇ ವಿಷ್ಣುಂ ನಿಧಾಯ ವೈ ॥ 4॥

ಅಷ್ಟಾಕ್ಷರಸ್ಯ ಮನ್ತ್ರಸ್ಯ ಋಷಿರ್ನಾರಾಯಣಃ ಸ್ವಯಮ್ ।
ಛನ್ದಶ್ಚ ದೈವೀ ಗಾಯತ್ರೀ ಪರಮಾತ್ಮಾ ಚ ದೇವತಾ ॥ 5॥

ಶುಕ್ಲವರ್ಣಂ ಚ ಓಂಕಾರಂ ನಕಾರಂ ರಕ್ತಮುಚ್ಯತೇ ।
ಮೋಕಾರಂ ವರ್ಣತಃ ಕೃಷ್ಣಂ ನಾಕಾರಂ ರಕ್ತಮುಚ್ಯತೇ ॥ 6॥

ರಾಕಾರಂ ಕುಂಕುಮಾಭಂ ತು ಯಕಾರಂ ಪೀತಮುಚ್ಯತೇ ।
ಣಾಕಾರಮಂಜನಾಭಂ ತು ಯಕಾರಂ ಬಹುವರ್ಣಕಮ್ ॥ 7॥

ಓಂ ನಮೋ ನಾರಾಯಣಾಯೇತಿ ಮನ್ತ್ರಃ ಸರ್ವಾರ್ಥಸಾಧಕಃ ।
ಭಕ್ತಾನಾಂ ಜಪತಾಂ ತಾತ ಸ್ವರ್ಗಮೋಕ್ಷಫಲಪ್ರದಃ ।
ವೇದಾನಾಂ ಪ್ರಣವೇನೈಷ ಸಿದ್ಧೋ ಮನ್ತ್ರಃ ಸನಾತನಃ ॥ 8॥

ಸರ್ವಪಾಪಹರಃ ಶ್ರೀಮಾನ್ ಸರ್ವಮನ್ತ್ರೇಷು ಚೋತ್ತಮಃ ।
ಏನಮಷ್ಟಾಕ್ಷರಂ ಮನ್ತ್ರಂ ಜಪನ್ನಾರಾಯಣಂ ಸ್ಮರೇತ್ ॥ 9॥

ಸಂಧ್ಯಾವಸಾನೇ ಸತತಂ ಸರ್ವಪಾಪೈಃ ಪ್ರಮುಚ್ಯತೇ ।
ಏಷ ಏವ ಪರೋ ಮನ್ತ್ರ ಏಷ ಏವ ಪರಂ ತಪಃ ॥ 10॥

ಏಷ ಏವ ಪರೋ ಮೋಕ್ಷ ಏಷ ಸ್ವರ್ಗ ಉದಾಹೃತಃ ।
ಸರ್ವವೇದರಹಸ್ಯೇಭ್ಯಃ ಸಾರ ಏಷ ಸಮುದ್ಧೄತಃ ॥ 11॥

ವಿಷ್ಣುನಾ ವೈಷ್ಣವಾನಾಂ ಹಿ ಹಿತಾಯ ಮನುಜಾಂ ಪುರಾ ।
ಏವಂ ಜ್ಞಾತ್ವಾ ತತೋ ವಿಪ್ರೋ ಹ್ಯಷ್ಟಾಕ್ಷರಮಿಮಂ ಸ್ಮರೇತ್ ॥ 12॥

ಸ್ನಾತ್ವಾ ಶುಚಿಃ ಶುಚೌ ದೇಶೇ ಜಪೇತ್ ಪಾಪವಿಶುದ್ಧಯೇ ।
ಜಪೇ ದಾನೇ ಚ ಹೋಮೇ ಚ ಗಮನೇ ಧ್ಯಾನಪರ್ವಸು ॥ 13॥

ಜಪೇನ್ನಾರಾಯಣಂ ಮನ್ತ್ರಂ ಕರ್ಮಪೂರ್ವೇ ಪರೇ ತಥಾ ।
ಜಪೇತ್ಸಹಸ್ರಂ ನಿಯುತಂ ಶುಚಿರ್ಭೂತ್ವಾ ಸಮಾಹಿತಃ ॥ 14॥

ಮಾಸಿ ಮಾಸಿ ತು ದ್ವಾದಶ್ಯಾಂ ವಿಷ್ಣುಭಕ್ತೋ ದ್ವಿಜೋತ್ತಮಃ ।
ಸ್ನಾತ್ವಾ ಶುಚಿರ್ಜಪೇದ್ಯಸ್ತು ನಮೋ ನಾರಾಯಣಂ ಶತಮ್ ॥ 15॥

ಸ ಗಚ್ಛೇತ್ ಪರಮಂ ದೇವಂ ನಾರಾಯಣಮನಾಮಯಮ್ ।
ಗನ್ಧಪುಷ್ಪಾದಿಭಿರ್ವಿಷ್ಣುಮನೇನಾರಾಧ್ಯ ಯೋ ಜಪೇತ್ ॥ 16॥

ಮಹಾಪಾತಕಯುಕ್ತೋsಪಿ ಮುಚ್ಯತೇ ನಾತ್ರ ಸಂಶಯಃ ।
ಹೃದಿ ಕೃತ್ವಾ ಹರಿಂ ದೇವಂ ಮನ್ತ್ರಮೇನಂ ತು ಯೋ ಜಪೇತ್ ॥ 17॥

ಸರ್ವಪಾಪವಿಶುದ್ಧಾತ್ಮಾ ಸ ಗಚ್ಛೇತ್ ಪರಮಾಂ ಗತಿಮ್ ।
ಪ್ರಥಮೇನ ತು ಲಕ್ಷೇಣ ಆತ್ಮಶುದ್ಧಿರ್ಭವಿಷ್ಯತಿ ॥ 18॥

ದ್ವಿತೀಯೇನ ತು ಲಕ್ಷೇಣ ಮನುಸಿದ್ಧಿಮವಾಪ್ನುಯಾತ್ ।
ತೃತೀಯೇನ ತು ಲಕ್ಷೇಣ ಸ್ವರ್ಗಲೋಕಮವಾಪ್ನುಯಾತ್ ॥ 19॥

ಚತುರ್ಥೇನ ತು ಲಕ್ಷೇಣ ಹರೇಃ ಸಾಮೀಪ್ಯಮಾಪ್ನುಯಾತ್ ।
ಪಂಚಮೇನ ತು ಲಕ್ಷೇಣ ನಿರ್ಮಲಂ ಜ್ಞಾನಮಾಪ್ನುಯಾತ್ ॥ 20॥

ತಥಾ ಷಷ್ಠೇನ ಲಕ್ಷೇಣ ಭವೇದ್ವಿಷ್ಣೌ ಸ್ಥಿರಾ ಮತಿಃ ।
ಸಪ್ತಮೇನ ತು ಲಕ್ಷೇಣ ಸ್ವರೂಪಂ ಪ್ರತಿಪದ್ಯತೇ ॥ 21॥

ಅಷ್ಟಮೇನ ತು ಲಕ್ಷೇಣ ನಿರ್ವಾಣಮಧಿಗಚ್ಛತಿ ।
ಸ್ವಸ್ವಧರ್ಮಸಮಾಯುಕ್ತೋ ಜಪಂ ಕುರ್ಯಾದ್ ದ್ವಿಜೋತ್ತಮಃ ॥ 22॥

ಏತತ್ ಸಿದ್ಧಿಕರಂ ಮನ್ತ್ರಮಷ್ಟಾಕ್ಷರಮತನ್ದ್ರಿತಃ ।
ದುಃಸ್ವಪ್ನಾಸುರಪೈಶಾಚಾ ಉರಗಾ ಬ್ರಹ್ಮರಾಕ್ಷಸಾಃ ॥ 23॥

ಜಾಪಿನಂ ನೋಪಸರ್ಪನ್ತಿ ಚೌರಕ್ಷುದ್ರಾಧಯಸ್ತಥಾ ।
ಏಕಾಗ್ರಮನಸಾವ್ಯಗ್ರೋ ವಿಷ್ಣುಭಕ್ತೋ ದೃಢವ್ರತಃ ॥ 24॥

ಜಪೇನ್ನಾರಾಯಣಂ ಮನ್ತ್ರಮೇತನ್ಮೃತ್ಯುಭಯಾಪಹಮ್ ।
ಮನ್ತ್ರಾಣಾಂ ಪರಮೋ ಮನ್ತ್ರೋ ದೇವತಾನಾಂ ಚ ದೈವತಮ್ ॥ 25॥

ಗುಹ್ಯಾನಾಂ ಪರಮಂ ಗುಹ್ಯಮೋಂಕಾರಾದ್ಯಕ್ಷರಾಷ್ಟಕಮ್ ।
ಆಯುಷ್ಯಂ ಧನಪುತ್ರಾಂಶ್ಚ ಪಶೂನ್ ವಿದ್ಯಾಂ ಮಹದ್ಯಶಃ ॥ 26॥

ಧರ್ಮಾರ್ಥಕಾಮಮೋಕ್ಷಾಂಶ್ಚ ಲಭತೇ ಚ ಜಪನ್ನರಃ ।
ಏತತ್ ಸತ್ಯಂ ಚ ಧರ್ಮ್ಯಂ ಚ ವೇದಶ್ರುತಿನಿದರ್ಶನಾತ್ ॥ 27॥

ಏತತ್ ಸಿದ್ಧಿಕರಂ ನೃಣಾಂ ಮನ್ತ್ರರೂಪಂ ನ ಸಂಶಯಃ ।
ಋಷಯಃ ಪಿತರೋ ದೇವಾಃ ಸಿದ್ಧಾಸ್ತ್ವಸುರರಾಕ್ಷಸಾಃ ॥ 28॥

ಏತದೇವ ಪರಂ ಜಪ್ತ್ವಾ ಪರಾಂ ಸಿದ್ಧಿಮಿತೋ ಗತಾಃ ।
ಜ್ಞಾತ್ವಾ ಯಸ್ತ್ವಾತ್ಮನಃ ಕಾಲಂ ಶಾಸ್ತ್ರಾನ್ತರವಿಧಾನತಃ ।
ಅನ್ತಕಾಲೇ ಜಪನ್ನೇತಿ ತದ್ವಿಷ್ಣೋಃ ಪರಮಂ ಪದಮ್ ॥ 29॥

ನಾರಾಯಣಾಯ ನಮ ಇತ್ಯಯಮೇವ ಸತ್ಯಂ
ಸಂಸಾರಘೋರವಿಷಸಂಹರಣಾಯ ಮನ್ತ್ರಃ ।
ಶೃಣ್ವನ್ತು ಭವ್ಯಮತಯೋ ಮುದಿತಾಸ್ತ್ವರಾಗಾ
ಉಚ್ಚೈಸ್ತರಾಮುಪದಿಶಾಮ್ಯಹಮೂರ್ಧ್ವಬಾಹುಃ ॥ 30॥

ಭೂತ್ವೋರ್ಧ್ವಬಾಹುರದ್ಯಾಹಂ ಸತ್ಯಪೂರ್ವಂ ಬ್ರವೀಮ್ಯಹಮ್ ।
ಹೇ ಪುತ್ರ ಶಿಷ್ಯಾಃ ಶೃಣುತ ನ ಮನ್ತ್ರೋsಷ್ಟಾಕ್ಷರಾತ್ಪರಃ ॥ 31॥

ಸತ್ಯಂ ಸತ್ಯಂ ಪುನಃ ಸತ್ಯಮುತ್ಕ್ಷಿಪ್ಯ ಭುಜಮುಚ್ಯತೇ ।
ವೇದಾಚ್ಛಾಸ್ತ್ರಂ ಪರಂ ನಾಸ್ತಿ ನ ದೇವಃ ಕೇಶವಾತ್ ಪರಃ ॥ 32॥

ಆಲೋಚ್ಯ ಸರ್ವಶಾಸ್ತ್ರಾಣಿ ವಿಚಾರ್ಯ ಚ ಪುನಃ ಪುನಃ ।
ಇದಮೇಕಂ ಸುನಿಷ್ಪನ್ನಂ ಧ್ಯೇಯೋ ನಾರಾಯಣಃ ಸದಾ ॥ 33॥

ಇತ್ಯೇತತ್ ಸಕಲಂ ಪ್ರೋಕ್ತಂ ಶಿಷ್ಯಾಣಾಂ ತವ ಪುಣ್ಯದಮ್ ।
ಕಥಾಶ್ಚ ವಿವಿಧಾಃ ಪ್ರೋಕ್ತಾ ಮಯಾ ಭಜ ಜನಾರ್ದನಮ್ ॥ 34॥

ಅಷ್ಟಾಕ್ಷರಮಿಮಂ ಮನ್ತ್ರಂ ಸರ್ವದುಃಖವಿನಾಶನಮ್ ।
ಜಪ ಪುತ್ರ ಮಹಾಬುದ್ಧೇ ಯದಿ ಸಿದ್ಧಿಮಭೀಪ್ಸಸಿ ॥ 35॥

ಇದಂ ಸ್ತವಂ ವ್ಯಾಸಮುಖಾತ್ತು ನಿಸ್ಸೃತಂ
ಸಂಧ್ಯಾತ್ರಯೇ ಯೇ ಪುರುಷಾಃ ಪಠನ್ತಿ ।
ತೇ ಧೌತಪಾಂಡುರಪಟಾ ಇವ ರಾಜಹಂಸಾಃ
ಸಂಸಾರಸಾಗರಮಪೇತಭಯಾಸ್ತರನ್ತಿ ॥ 36॥

ಇತಿ ಶ್ರೀನರಸಿಂಹಪುರಾಣೇ ಅಷ್ಟಾಕ್ಷರಮಾಹಾತ್ಮ್ಯಂ ನಾಮ ಸಪ್ತದಶೋsಧ್ಯಾಯಃ ॥ 17॥