ಶ್ರೀಲಕ್ಷ್ಮೀಹಯವದನ ರತ್ನಮಾಲಾ ಸ್ತೋತ್ರಂ

ಶ್ರೀಲಕ್ಷ್ಮೀಹಯವದನ ರತ್ನಮಾಲಾ ಸ್ತೋತ್ರಂ
(ಶ್ರೀ ಲಕ್ಷ್ಮೀಹಯಗ್ರೀವ ದಿವ್ಯಪಾದುಕಾಸೇವಕ ಶ್ರೀಮದಭಿನವರಂಗನಾಥ ಬ್ರಹ್ಮತಂತ್ರಪರಕಾಲ ಮಹಾದೇಶಿಕ ಕೃತಿಷು)
ವಾಗೀಶಾಖ್ಯಾ ಶ್ರುತಿಸ್ಮೃತ್ಯುದಿತಶುಭತನೋ-
ರ್ವಾಸುದೇವಸ್ಯ ಮೂರ್ತಿಃ
ಜ್ಞಾತಾ ಯದ್ವಾಗುಪಜ್ಞಂ ಭುವಿ ಮನುಜವರೈ-
ರ್ವಾಜಿವಕ್ತ್ರಪ್ರಸಾದಾತ್ |
ಪ್ರಖ್ಯಾತಾಶ್ಚರ್ಯಶಕ್ತಿಃ ಕವಿಕಥಕಹರಿಃ
ಸರ್ವತಂತ್ರಸ್ವತಂತ್ರಃ
ತ್ರಯ್ಯಂತಾಚಾರ್ಯನಾಮಾ ಮಮ ಹೃದಿ ಸತತಂ
ದೇಶಿಕೇಂದ್ರಃ ಸ ಇಂಧಾಂ ||1||
ಸತ್ವಸ್ಥಂ ನಾಭಿಪದ್ಮೇ ವಿಧಿಮಥ ದಿತಿಜಂ ರಾಜಸಂ ತಾಮಸಂ ಚಾ-
ಬ್ಬಿಂದ್ವೋರುತ್ಪಾದ್ಯ ತಾಭ್ಯಾಮಪಹೃತಮಖಿಲಂ ವೇದಮಾದಾಯ ಧಾತ್ರೇ |
ದತ್ತ್ವಾ ದ್ರಾಕ್ತೌ ಚ ಹತ್ವಾ ವರಗಣಮದಿಶದ್ ವೇಧಸೇ ಸತ್ರ ಆದೌ
ತಂತ್ರಂ ಚೋಪಾದಿಶದ್ಯಸ್ಸ ಮಮ ಹಯಶಿರಾ ಮಾನಸೇ ಸನ್ನಿಧತ್ತಾಂ ||2||
ಅಧ್ಯಾಸ್ತೇsಂಕಂ ಪರಾವಾಕ್ ವರಹಯಶಿರಸೋ
ಭರ್ತುರಾಚಾರ್ಯಕೇ ಯಾ
ವಾಂಛಾವಾನೈತರೇಯೋಪನಿಷದಿ ಚರಮಾತ್-
ಪ್ರಾಕ್ತನೇ ಖಂಡ ಅದೌ |
ಯಸ್ಯಾ ವೀಣಾಂ ಚ ದೈವೀಂ ಮನಸಿ ವಿನಿಧತ್-
ಖ್ಯಾತಿಮೇತ್ಯಂತ್ಯಮಂತ್ರೇ
ಸೇಶಾನಾ ಸರ್ವವಾಚೋ ಮಮ ಹೃದಯಗತಾ-
ಚಾರು ಮಾಂ ವಾದಯೇದ್ವಾಕ್ ||3||
ಕೃಷ್ಣಂ ವಿಪ್ರಾ ಯಮೇಕಂ ವಿದುರಪಿ ಬಹುಧಾ
ವೇದಯೋರಾದಿಮಾಂತೇ
ಸ್ರಷ್ಟಾ ವಿಸ್ರಂಸಮಾನಸ್ಸ್ವಮಥ ಸಮದಧಾ-
ಚ್ಛಂದಸಾಂ ಯೇನ ದಾನಾತ್ |
ಕೃಷ್ಣಂ ವಿಷ್ಣುಂ ಚ ಜಿಷ್ಣುಂ ಕಲಯಿತುರಪಿ
ಯತ್ಸಂಹಿತಾಮಾಯುರುಕ್ತಂ
ವಾಕ್ಷ್ಲಿಷ್ಟಂ ಪ್ರಾಣಮೇನಂ ಹಯಮುಖಮನುಸ-
ಂದಧ್ಮಹೇ ಕಿಂ ವೃಥಾsನ್ಯೈಃ ||4||
ಪ್ರಖ್ಯಾತಾ ಯಾssಶ್ವಲಾಯನ್ಯಧಿಕಫಲದಶಶ್ಲೋಕ್ಯಭಿಖ್ಯಾ ತದಂತಃ
ಶ್ರುತ್ಯುಕ್ತಾ ವಾಕ್ ಸರಸ್ವತ್ಯಪಿ ಹಯಮುಖ ತೇ ಶಕ್ತಿರನ್ಯಾ ನ ಯುಕ್ತಾ |
ಪೂರ್ಣಾ ತ್ವಚ್ಛಕ್ತಿರರ್ಧಂ ಭವತಿ ವಿಧಿವಧೂರ್ಯಾ ನದೀ ಸಾ ಕಾಲಾಸ್ಯಾ
ಇತ್ಯುಕ್ತೇರ್ಬ್ರಹ್ಮವೈವರ್ತ ಇಹ ಸಮುದಿತಾ ಸ್ಯಾತ್ಪರಾ ನಿಮ್ನಗಾsನ್ಯಾ ||5||
ಶ್ರೀಹರ್ಷೋ ವಿಷ್ಣುಪತ್ನೀಂ ವದತಿ ಕವಿರಿಮಾಂ ನೈಷಧೇ ಮಲ್ಲಿನಾಥಃ
ಖ್ಯಾತಾಮೇತಾಂ ಪುರಾಣೇ ಹಯಮುಖ ಭುವಿ ಚ ಸ್ಥಾಪಿತಾಂ ವಿಷ್ಣುಪಾರ್ಶ್ವೇ |
ಧೀವಾಗ್ನಿತ್ವಾರ್ಥಜಪ್ಯಂ ದಿನಮುಖಸಮಯೇ ಶೌನಕಸ್ಸೂಕ್ತಮಸ್ಯಾಃ
ಶ್ರೀಯುಕ್ತಂ ಬಹ್ವೃಚಸ್ಸ ಸ್ಮೃತಿಕೃದಪಿ ತದಾ ಚಿಂತನೀಯಂ ತಥೈನಾಂ ||6||
ವಾಗಾಂಭೃಣ್ಯಾದಿಸೂಕ್ತೇ ನಿರವಧಿಮಹಿಮಾ
ಯಾ ಶ್ರುತಾ ವಾಕ್ ಚ ದೇವೀ
ಪೂರ್ವೇ ಸೂಕ್ತೇsಪಿ ಹಂಸಸ್ತ್ವಮಧಿಕಮಹಿಮಾ
ವಿಶ್ರುತೋ ಬಹ್ವೃಚೈರ್ಯಃ |
ಯುಕ್ತಾವಾರಣ್ಯಕೇ ತೌ ಕಥಿತಬಹುಗುಣೌ
ಸಾಮನೀ ಸಂಹಿತೇತ್ಯ-
ಪ್ಯಾರಾಧ್ಯೋ ವ್ಯೂಹರೂಪೀ ಹಯಮುಖ ವಿದಿತೋ
ಜ್ಞಾನಿನಾಂ ಕರ್ಮಭಿಸ್ತ್ವಂ ||7||
ಇಂದ್ರೋ ವೃತ್ರಂ ಹನಿಷ್ಯನ್ ಸಖಿವರ ವಿತರಂ ವಿಕ್ರಮಸ್ವೇತಿ ವಿಷ್ಣುಂ
ಸಂಪ್ರಾರ್ಥ್ಯಾತೋ ಹತಾರಿಸ್ತತ ಉಪಜನಿತ ಬ್ರಹ್ಮಹತ್ಯಾ ಪನುತ್ಯೈ |
ಸೂಕ್ತಾಭ್ಯಾಮಾಹುತಿಂ ಯಂ ಪ್ರತಿ ಪರಮಜುಹೋನ್ಮೂರ್ಧ್ನಿ ಗಂಧರ್ವ ಏಕೋ
ದೇವಾನಾಂ ನಾಮಧಾರೀ ಸ ಮಮ ದೃಢಮತಾವದ್ಯ ವಾಚಸ್ಪತಿಸ್ಸ್ತಾತ್ ||8||
ವೇದೇ ಚಾಥರ್ವಣಾಖ್ಯೇ ಪ್ರಥಮತ ಉದಿತಂ ಯತ್ತ್ರಿಷಪ್ತೀಯಸೂಕ್ತಂ
ತನ್ಮೇಧಾಜನ್ಮಕರ್ಮಾಂಗಮಿತಿ ನಿಗದಿತಂ ಕೌಶಿಕೇನ ಸ್ವಸೂತ್ರೇ |
ಮೇಧಾಕಾಮಃ ಪುರ್ಮಾ ಯಸ್ತುರಗಮುಖ ತತಸ್ಸರ್ವಲೋಕಾಧಿನಾಥಂ
ಧ್ಯಾಯೇದ್ವಾಚಸ್ಪತಿಂ ತ್ವಾಂ ಪ್ರಭವತಿ ಸಕಲಸ್ತಚ್ಛ್ರತಾರ್ಥೋsಪ್ರಕಂಪ್ಯಃ ||9||
ನಾಸನ್ನೋ ಸತ್ತದಾನೀಮಪಿ ತು ಕಮಲಯಾ-
sವಾತಮೇಕಂ ತದಾನಿತ್
ತಸ್ಮಾದ್ಧಾನ್ಯತ್ಪರಂ ಕಿಂಚಿದಪಿ ನ ತಮಸಾ
ಗೂಢಮಗ್ರೇ ಪ್ರಕೇತಂ |
ಅದ್ಧಾ ಕೋ ವೇದ ಹೇತುಂ ದ್ವಿವಿಧಮವಿಗುಣಂ
ವಾಸುದೇವಾಭಿಧಾನಂ
ವ್ಯೂಹಂ ತ್ವಾಂ ಪ್ರಾತರರ್ಚ್ಯಂ ಹಯಮುಖ ಭಗಮಾ-
ಹುಃ ಕ್ರಮಾತ್ತೈತ್ತಿರೀಯಾಃ ||10||
ಪ್ರಾತಃಪೂಜ್ಯಂ ಭಗಾಖ್ಯಂ ಪ್ರಥಮಮಕಥಯನ್
ಬಹ್ವೃಚಾಃ ಪಂಚಮೇsಥೋ
ನಾಸತ್ಸೂಕ್ತೇsಷ್ಟಮೇ ಪ್ರಾಗ್ವದಪಿ ಸಮವದನ್
ತೈತ್ತಿರೀಯಕ್ರಮಾತ್ತ್ವಾಂ |
ಪಾರಾಶರ್ಯೋsವತೀರ್ಣಂ ವದತಿ ಹಯಮುಖಾ-
ಥರ್ವಣಃ ಕೌಶಿಕಸ್ತ್ವಾಂ
ಮೇಧಾರ್ಥಂ ಪ್ರಾತರರ್ಚ್ಯಂ ಭಗಮನುಮನುತೇ
ಸಂಹಿತಾsಪ್ಯಾಹ ಸಾಧು ||11||
ಪ್ರದ್ಯುಮ್ನಾಂತಂ ತ್ರಿಪಾದ್ಭಾಸ್ವರವಪುರಮೃತಂ ವಾಸುದೇವಾದಿಬೃಂದೇ
ಪಾದಸ್ತತ್ರಾನಿರುದ್ಧೋ ಭುವಿ ತತ ಉದಭೂದಾತ್ಮಭೂಋಗ್ವಿಧಿಜ್ಞಾಃ |
ಹುತ್ವಾ ತ್ವಾಂ ಯಜ್ಞರೂಪಂ ಹಯವದನ ಜಿತಂತೇ ಸ್ತುತಿಂ ತನ್ವತೇsತಃ
ನಿರ್ಣೀತಂ ಸರ್ವವೇದೇಷ್ವನುಪಮಮಿತಿ ತತ್ಪೌರುಷಂ ಸೂಕ್ತಮಾಪ್ತೈಃ ||12||
ಸರ್ವೇ ವೇದಾಃ ಪ್ರಜಾಶ್ಚ ಪ್ರಚುರಬಹುಭಿದಾಃ ಸಂಶ್ರಯಂತೇ ಯಮೇಕಂ
ಶಾಸ್ತಾ ಯೋsಂತಃಪ್ರವಿಷ್ಟಸ್ಸ್ವಯಮಪಿ ದಶಧಾತ್ಮಾಚರತ್ಯರ್ಣವೇ ಯಂ |
ಬ್ರಹ್ಮಾ ಚೈಕೋನ್ವವಿಂದದ್ಧರಿಮಿಹ ದಶಹೋತಾರಮಂತಶ್ಚ ಚಂದ್ರೇ
ದೇವಾಸ್ಸಂತಂ ಸಹೈನಂ ನ ಹಿ ವಿದುರವತಾತ್ಸೋsದ್ಯ ವಾಚಸ್ಪತಿರ್ಮಾಂ ||13||
ಯಸ್ಮಾದ್ಬ್ರಹ್ಮಾ ಚ ರುದ್ರಸ್ಸಕಲಜಗದಿದಂ
ಜಾಯತೇಂsತರ್ಬಹಿರ್ಯತ್
ವ್ಯಾಪ್ತ್ಯಾಸತ್ತಾಂ ಚ ಯಸ್ಮಿನ್ ಲಯಮಪಿ ಲಭತೇ
ಯಶ್ಚತುರ್ವೇದಮೂರ್ತಿಃ |
ವಿಷ್ಣುರ್ನಾರಾಯಣೋsಷ್ಟಾಕ್ಷರಪದವಿದಿತೋ
ದೇವಕೀಪುತ್ರ ಏಕೋ
ಯೋsಥರ್ವಾಂಗೇ ಮಧೋಃ ಸೂದನ ಉಪನಿಷದಿ
ಜ್ಞಾಯತೇ ಮೇ ಸ ಇಂಧಾಂ ||14||
ಶಕ್ತಿಃ ಸ್ವಾಭವಿಕೀ ಸಾತ್ರ ಚ ವಿವಿಧಪರಾ ಶ್ರೂಯತೇ ಜ್ಞಾನಮೇವಂ
ತ್ರೇಧಾ ತತ್ರ ಕ್ರಿಯೇತ್ಥಂ ಬಲಮಪಿ ತದಸೌ ವಾಸುದೇವಃ ಸ ಹಂಸಃ |
ಯೋ ಬ್ರಹ್ಮಾಣಂ ವಿಧಾಯ ಪ್ರಥಮಮಥ ಪರಾನ್ ಪ್ರಾಹಿಣೋತ್ಸರ್ವವೇದಾನ್
ತಸ್ಮೈ ದೇವಂ ಪ್ರಪದ್ಯೇ ಶರಣಮಹಮಿಮಂ ಚಾಮೃತಸ್ಯೈಷ ಸೇತುಃ ||15||
ವವ್ಯ್ರೋ ವಿಷ್ಣುರ್ಧನುರ್ಜ್ಯಾಂ ಹಯವದನ ವರಾ-
ನ್ನೇಚ್ಛಯಾ ಚಿಚ್ಛಿದುಸ್ತತ್
ಕೋಟ್ಯಾ ಚ್ಛಿನ್ನಂ ಚ ವಿಷ್ಣೋಃ ಶಿರ ಇತಿ ಗದಿತಂ
ಯತ್ಪ್ರವರ್ಗ್ಯಾರ್ಥವಾದೇ |
ತಚ್ಛೀರ್ಷಂ ಯಾಜಮಾನಂ ಶ್ರುತಿಮುಖತ ಇದಂ
ಸ್ಥಾಪಿತಂ ಯುಕ್ತಿತೋsಪಿ
ಪ್ರಾದುರ್ಭಾವಃ ಸ ಗೌಣೋ ಬಹುಮುಖಹರಿವಂ-
ಶಾದಿನಿರ್ಧಾರಿತೋ ವಾ ||16||
ಶುಕ್ಲಂ ವೇದಂ ವಿವಸ್ವಾನುಪದಿಶಸಿ ಪರಂ ಯಾಜ್ಞವಲ್ಕ್ಯಾಯ ವಾಜೀ
ವೇದೈಕಾರ್ಥೈರ್ವಚೋಭಿರ್ಮಿತಮಿದಮಖಿಲಾಮ್ನಾಯಧೀಕಾರಿಣೀಂ ಯಾಂ |
ವಾಗ್ದೇವೀಂ ಮೋಕ್ಷಧರ್ಮೇ ಕಥಯತಿ ಮುನಿರಾಟ್ ತತ್ಕೃಪಾಲಬ್ಧಭೂಮಾ
ತ್ವಚ್ಛಕ್ತಿಸ್ಸೇತ್ಯಕಂಪ್ಯಂ ಹಯಮುಖ ಗದಿತಂ ಬ್ರಹ್ಮವೈವರ್ತವಾಗ್ಭಿಃ ||17||
ತಸ್ಮಾದ್ವೇದೇsಪಿ ತತ್ರೋಪನಿಷದಿ ಬೃಹದಾರಣ್ಯಕೇ ಕಾಂಡ ಆತ್ಮಾ
ತ್ವಂ ವಾಗ್ದೇವ್ಯಾ ಸಹಾದೌ ಜನಯಸಿ ಮಿಥುನೀಭೂಯ ಸರ್ವಾಂಶ್ಚ ವೇದಾನ್
ಧಾತಾರಂ ತಸ್ಯ ಪತ್ನೀಂ ತದನು ತದುಭಯದ್ವಾರಿಕಾಂ ವ್ಯಷ್ಟಿಸೃಷ್ಟಿಂ
ತದ್ಯಜ್ಞಾರಾಧಿತೋsಸ್ಮೈ ಹಯವದನ ವರಾನ್ಯಚ್ಛಸೀತಿ ಪ್ರತೀಮಃ ||18||
ತರ್ಯೇsಧ್ಯಾಯೇ ದ್ವಿತೀಯಂ ತುರಗಮುಖ ಶಿಶು-
ಬ್ರಾಹ್ಮಣಂ ವ್ಯೂಹರೂಪಂ
ಪ್ರಾಣಂ ಸ್ತೂಣಾಂ ಶಿಶುಂ ತ್ವಾಂ ಚಮಸಮಪಿ ಶಿರೋ-
sರ್ವಾಗ್ಬಿಲಂ ಚೋರ್ಧ್ವಬುಧ್ನಂ |
ಸಪ್ತಾನಾಂ ದೇವತಾನಾಮಧಿಕರನಮಮಿ-
ತ್ರೇಂದ್ರಿಯಾಣಾಂ ಜಯಾರ್ಥಂ
ವಾಚಾಷ್ಟಮ್ನಾ ಯುತಂ ತ್ವಾಂ ಪರಿಕಲಯತಿ ತದ್-
ಬ್ರಹ್ಮ ಭಕ್ತಾರ್ತಿಹಾರಿ ||19||
ದಧ್ಯಙ್ಙಾಥರ್ವಣೋಶ್ವಿತ್ರಿದಶಕೃತಶಿರೋಧಾರಣಾದಶ್ವಮೂರ್ಧ್ನಾ
ತಾಭ್ಯಾಂ ಪ್ರಾವರ್ಗ್ಯತತ್ತ್ವಂ ಹಯಮುಖ ಸಮುಪಾದಿಕ್ಷದೇತದ್ಯಥಾರ್ಥಂ |
ಏತಾವತ್ಯೇವ ತತ್ತ್ವೇ ಕಲಿಬಲವಶತಸ್ತಾಮಸಾಶ್ಯಕ್ತ್ಯಧೀನಂ
ತಾಮತ್ಕಂ ಶೀರ್ಷಮಾಹುರ್ಭುವಿ ಜನಿಸಮಯೇ ತ್ವತ್ಕಟಾಕ್ಷಾತಿದೂರಾಃ ||20||
ದಧ್ಯಙ್ಙಾಥರ್ವಣೋ ಯೋ ಹಯಮುಖ ಬೃಹದಾ-
ರಣ್ಯಕೇ ಕಾಂಡ ಆದೌ
ಆಹ ಪ್ರಾವರ್ಗ್ಯತತ್ತ್ವಂ ಯದಪಿ ಶತಪಥೇ
ದೀಕ್ಷಣೀಯಾರ್ಥವಾದೇ |
ವಿಷ್ಣ್ವಾಖ್ಯಂ ತತ್ತ್ವಮುಕ್ತಂ ಪುನರುಪನಿಷದಿ
ಬ್ರಹ್ಮವಾಗೀಶರೂಪಂ
ಯಚ್ಚ ಪ್ರೋಕ್ತಂ ತೃತೀಯೇ ತದಪಿ ಚ ಸ ಮಧು -
ಬ್ರಾಹ್ಮಣೇ ವಕ್ತಿ ತುರ್ಯೇ ||21||
ವಾಚಾ ದೇವ್ಯಾನಿರುದ್ಧೇನ ಚ ಸೃಜತಿ ಜಗತ್ಸರ್ವಮಿತ್ಯಗ್ರ ಉಕ್ತೋ
ವಾಹಾಸ್ಯೋ ವಾಸುದೇವಃ ಸ ಪರ ಮಧುಬ್ರಾಹ್ಮಣಂ ಸ್ಥಾಪಯಿತ್ವಾ |
ದಧ್ಯಙ್ಙಾಥರ್ವಣೋಶ್ವಿತ್ರಿದಶಹಿತಮಧುತ್ವಾಷ್ಟ್ರಕಕ್ಷ್ಯೋಪದೇಷ್ಟಾ
ತತ್ತ್ವಂ ಜಾನಾತಿ ಚೇತ್ಯಪ್ಯಖಿಲಶುಭತನುಂ ವಕ್ತಿ ವಾಗೀಶ್ವರಂ ತ್ವಾಂ ||22||
ದಧ್ಯಙ್ಙಾಥರ್ವಣೋsಸಾವುಪದಿಶತಿ ಮಧುಬ್ರಾಹ್ಮಣಂ ತ್ವಾಷ್ಟ್ರಕಕ್ಷ್ಯಂ
ಯತ್ತನ್ನಾರಾಯಣಾಖ್ಯಂ ಕವಚಮಿತಿ ಸಮಾಘುಷ್ಯತೇ ಸಾತ್ವಿಕಾರ್ಗ್ಯೈಃ |
ವೃತ್ರಸ್ಯೇದಂ ವಧಾಯಾಲಮಿತಿ ಹಯಮುಖ ಬ್ರಹ್ಮವಿದ್ಯೇತಿ ತತ್ತ್ವಂ
ವಾಗೀಶೈತೇ ನ ಜಾನಂತ್ಯನಘ ತವ ಕೃಪಾಬಾಹ್ಯತಾಂ ಯೇ ಪ್ರಯಾತಾಃ ||23||
ತತ್ತ್ವಂ ನಾರಾಯಣಾಖ್ಯೋಪನಿಷದಿ ಕಥಿತಂ ಪಮಚರಾತ್ರೋಕ್ತರೀತ್ಯಾ
ತನ್ನಾಮಾಖ್ಯಾನ ಆಹಾಶ್ವಮುಖ ವಿಶದಮಾದ್ಯಂ ಚ ಧರ್ಮಂ ಮುನೀದ್ರಃ |
ಗೀತಾಯಂ ಸಂಗೃಹೀತಂ ವಿಶದಯಿತುಮನಾಃ ಕೃಷ್ಣವಾಹಾನನೈಕ್ಯಂ
ಬ್ರೂತೇ ವೇದೋದಿತತ್ವಂ ಸ್ಥಿರಯತಿ ಚ ತದತ್ರೋಕ್ತ ಏಕಾಂತಿಧರ್ಮೇ ||24||
ಅದೌ ನಾರಾಯಣಂ ತಂ ವದತಿ ಮಧುಜಿತಂ ದೇವಕೀಪುತ್ರಮಂತೇ
ವೇದಾಂತೋ ಮೋಕ್ಷಧರ್ಮೇ ವರಹಯಶಿರಸಂ ಪ್ರಾಹ ಕೃಷ್ಣಸ್ಸ್ವಮೇವ |
ಇತ್ಯಾಲೋಚ್ಯೈವ ಯೋಗೀ ಕಲಿಜಿದಭಿಜಗೌ ತತ್ಕ್ರಮಾತ್ ಸ್ತೈತಿ ಮಧ್ಯೇ
ವಾಹಾಸ್ಯ ತ್ವಾಂ ಶಠಾರಿರ್ಮುನಿರಪಿ ಮುನಿತೇsಶ್ವಂ ಪುರಃ ಕೃಷ್ಣಮಂತೇ ||25||
ಜನ್ಮಾದೀನಾಂ ನಿದಾನಂ ಕತಿಚಿದಕಥಯನ್
ದೇವಮೇಕಂ ತಥಾsನ್ಯೇ
ದೇವೀಮೇಕಾಂ ವಿದುಸ್ತನ್ಮಿಥುನಮವಿಕಲಂ
ಬ್ರಹ್ಮ ವೇದಾಂತವೇದ್ಯಂ |
ಇತ್ಯೇವಂ ಸ್ಥಾಪಯಿತ್ವಾ ಚಿದಚಿದವಿಯುತಂ
ಶ್ರೀಮದೇಕಂ ತದಿತ್ಯ-
ಪ್ಯಾಚಖ್ಯೌ ಮೋಕ್ಷಧರ್ಮೇ ಹಯಮುಖ ಜನಿವ್ರ-
ತ್ತಾಪದೇಶಾನ್ಮುನೀಂದ್ರಃ ||26||
ಶ್ರಾವಣ್ಯಾಂ ತೇsವತಾರೇ ಹಯಮುಖ ನಿಗಮೋದ್ಧಾರಣಾರ್ಥತ್ವಬುದ್ಧೇಃ
ಋಗ್ವೇದೋಪಕ್ರಮಸ್ತಚ್ಛ್ರವಣಭ ಇತಿ ನಿಶ್ಚಿನ್ವತೇ ಬಹ್ವೃಚಾರ್ಗ್ಯಾ |
ಪ್ರಾರಂಭಃ ಪೌರ್ಣಮಾಸ್ಯಾಂ ಯಜುಷ ಇತಿ ಪರೇ ಯಾಜುಷಾಃ ಸಂಗಿರಂತೇ
ತದ್ವೇದೋಪಕ್ರಮಾಂತೇ ಭುವಿ ವಿಧಿವಶಗಾಸ್ತ್ವಾಂ ಸಮಾರಾಧಯಂತಿ ||27||
ವಿಷ್ಣೋಃ ಪತ್ನೀ ಪರಾ ವಾಗಿತಿ ಬಹುಮನುತೇ ಭರತೀ ಯಾಂ ಯದೀಶಃ
ಪತ್ಯುಃ ಪ್ರಾಕ್ಪಂಚರಾತ್ರಂ ಶ್ರುತಿಮಪಿ ಸಮುಪಾದಿಕ್ಷದಿತ್ಯಾದರೇಣ |
ತದ್ವಾಗಾಶ್ಲಿಷ್ಟಮೂರ್ತಿಂ ಹಯಶಿರಸ ಉಪಾರಾಧಯಂತೀ ನಿಶಮ್ಯ
ಶ್ರೀಭಾಷ್ಯಂ ಲಕ್ಷ್ಮಣಾಯ ಸ್ವಪತಿವಿದಿತ ಯತ್ಯಾಕೃತಿಂ ಬಿಭ್ರತೇsದಾತ್ ||28||
ವಾಗೀಶಾನಸ್ಯ ಮಂತ್ರಂ ಶ್ರುತಿಶಿಖರಗುರು -
ಸ್ತಾಕ್ರ್ಷ್ಯಲಕ್ಷಂ ಜಪಿತ್ವಾ
ತತ್ಕಾಲ ಪ್ರಾಪ್ತ ಲಾಲಾಮೃತಮಪಿಬದಹೀ-
ಂದ್ರಾಖ್ಯಪುರ್ಯಾಂ ಯತೀಂದ್ರೋಃ |
ಮಾತುರ್ಭ್ರಾತುಸ್ತನೂಜೋತ್ತಮಗುಣಕುರುಕಾ-
ಧೀಶವಂಶ್ಯಾರ್ಚಿತಾಂ ತ-
ನ್ಮೂರ್ತಿಂ ಸಂಪ್ರಾಪ್ಯ ಕಾಂಚ್ಯಾಂ ಸ್ವಯಮಪಿ ಚಿರಮಾ-
ರಾಧಯದ್ಭಕ್ತಿಭೂಮ್ನಾ ||29||
ಕಲೇ ವೇದಾಂತಸೂರಿಃ ಸ್ವಪದಮುಪಗತಂ ಬ್ರಹ್ಮತಂತ್ರಸ್ವತಂತ್ರಂ
ಶಿಷ್ಯಾರ್ಗ್ಯಂ ಮೂರ್ತಿಮೇನಾಂ ಸಮನಯದಥ ತಚ್ಛಾತ್ರಪಾರಂಪರೀಃ |
ಸೇಯಂ ವಾಗೀಶಮೂರ್ತಿರ್ಗುರುವರಪರಕಾಲಾದಿಭಿಃ ಸೇವ್ಯಮಾನಾ
ರಮ್ಯಾಸ್ಥಾನ್ಯಾಂ ತ್ರಿಕಾಲಂ ವಿಲಸತಿ ವಿಹಿತಾರ್ಚಾದ್ಯ ಕರ್ಣಾಟದೇಶೇ ||30||
ಧರ್ಮಂ ಪೂರ್ವಾಶ್ರಮೋಕ್ತಂ ಸುಕರಮಪಿ ನ ಕೃ-
ತ್ವಾಂsತಿಮೋಕ್ತಸ್ಯ ತಸ್ಯಾ -
ನುಷ್ಠಾನೇsಶಕ್ತಿಭೀತಂ ಹಯಮುಖ ಕೃಪಣಂ
ಲಂಭಯಿತ್ವಾssಶ್ರಮಂ ತಂ |
ಶೋಭೋದ್ರೇಕಾದಿನಾsರ್ಚಾವಿಶಯ ಉಪಗತೇ
ಕೋಟಿಪೂಜ್ಯಾಂ ತುಲಸ್ಯಾ
ಸ್ವೋಪಾಖ್ಯಾವ್ಯಾಕೃತಿಂ ಚಾಕಲಯಸಿ ಕಿಯತೀ
ಮಯ್ಯನರ್ಘಾ ದಯಾ ತೇ ||31||
ಇತ್ಥಂ ವಾಗೀಶಪಾದೂಯುಗಲಸತತಸಂಸೇವನಾರ್ಚಾದಿದೀಕ್ಷಃ
ತತ್ರೈತಾಂ ನವ್ಯರಂಗೇಶ್ವರಯತಿರನಘಾಮಾರ್ಪಯದ್ರತ್ನಮಾಲಾಂ |
ಏನಾಂ ನಿತ್ಯ ಪಠಂತೋ ಭುವಿ ಮನುಜವರಾ ಭಕ್ತಿಭೂಮ್ನೇಪ್ಸಿತಾರ್ಥಾನ್
ಸರ್ವಾನ್ ವಿಂದಂತಿ ವಾಹಾನನವರಕರುಣಾಪಾಂಗಧಾರಾಭಿಷೇಕಾತ್ ||32||
||ಇತಿ ಶ್ರೀಲಕ್ಷ್ಮೀಹಯವದನರತ್ನಮಾಲಾಸ್ತೋತ್ರಂ ಸಂಪೂರ್ಣಂ||