ಶ್ರೀರಾಮಾನುಜಪಂಚಾಶತ್

ಶ್ರೀರಾಮಾನುಜಪಂಚಾಶತ್
(ಶ್ರೀಮತ್ ಮೈಸೂರ್ ಆಂಡವನ್ ಶ್ರೀ ಶ್ರೀನಿವಾಸರಾಮಾನುಜಮಹಾದೇಶಿಕೈಃ ಅನುಗೃಹೀತಾ)
ಶ್ರೀಮಾನ್ ವೇಂಕಟನಾಥಾರ್ಯಃ ಕವಿತಾರ್ಕಿಕಕೇಸರೀ |
ವೇದಾಂತಾಚಾರ್ಯವರ್ಯೋ ಮೇ ಸನ್ನಿಧತ್ತಾಂ ಸದಾ ಹೃದಿ ||
ಯತ್ಕೃಪಾಲೇಶಮಾತ್ರೇಣ ಸದೋಲ್ಲಸತಿ ಸನ್ಮತಿಃ |
ವೇದಾಂತಲಕ್ಷ್ಮಣಮುನಿಃ ಸನ್ನಿಧತ್ತಾಂ ಸದಾ ಹೃದಿ ||
ಶ್ರೀಮಾನ್ ರಾಮಾನುಜಾಚಾರ್ಯೋ ವಿಶಿಷ್ಟಾದ್ವೈತದೇಶಿಕಃ |
ವೇದಾಂತಾ ಯೇನ ಸಂತ್ರಾತಾಸ್ಸನ್ನಿಧತ್ತಾಂ ಸದಾ ಹೃದಿ ||1||
ಹಾರೀತಕೇಶವಸುಧೀಹೃದಯಾಬ್ಜಮಿತ್ರಂ
ಲೋಕೈಕಮಿತ್ರಮವಧಾರಿತಸರ್ವಶಾಸ್ತ್ರಂ |
ಸದ್ವಂಶ್ಯಸಚ್ಚರಿತಕಾಂತಿಮತೀತನೂಜಂ
ರಾಮಾನುಜಂ ಗುರುವರಂ ಶರಣಂ ಪ್ರಪದ್ಯೇ ||2||
ಪಿಂಗಳಾಬ್ದಚೈತ್ರಶುಕ್ಲಪಂಚಮೀಯುಗಾರ್ದ್ರಭೇ
ವಾಸರೇ ಗುರೋಶ್ಯುಭೇ ಹಿ ಹಾರಿತಾನ್ವಯೇಂದುನಾ |
ವಿಪ್ರವರ್ಯಕೇಶವಾಭಿಧೇನ ಸೋಮಯಾಜಿನಾ
ಮಾದ್ರಿಪೂರ್ಣಸೋದರೀಭುವಿ ಪ್ರಸೂತಮಾಶ್ರಯೇ ||3||
ಶೇಷಾವತಾರ ಇತಿ ಮಾಧವಪಂಚಹೇತಿ
ರೂಪಾವತಾರ ಇತಿ ಸೈನ್ಯಪತೇಶ್ಚ ರೂಪಂ |
ಇತ್ಯಾದರಾತ್ ಯದವತಾರವಿದೋ ಜಗುಸ್ತಂ
ರಾಮಾನುಜಂ ಯತಿಪತಿಂ ಶರಣಂ ಪ್ರಪದ್ಯೇ ||4||
ಪದ್ಮಾಸನಸ್ಥಿತಿಮಭೀತಿಕರ ಶ್ರಿತಾನಾಂ
ತತ್ತ್ವಂ ಪರಂ ಸಮುಪದೇಷ್ಟುಮುಪಾತ್ತಮುದ್ರಂ |
ಕಾಷಾಯಮಂಡಿತತನುಂ ಕರಧೃತ್ತ್ರಿದಂಡಂ
ರಾಮಾನುಜಂ ಮುನಿವರಂ ಶರಣಂ ಪ್ರಪದ್ಯೇ ||5||
ಮದಂತಸ್ಸಂತಾಪಂ ಶಮಯತು ಗುರುರ್ಯಸ್ಯ ಚ ಗಿರಃ
ತ್ರಯೀಚೂಡಾನಿಷ್ಯನ್ಮಧುರರಸಪೀಯೂಷ ಭರಿತಾಃ |
ಅಲಂಕುರ್ವನ್ ಲಕ್ಷ್ಮೀರಮಣಹೃದಯಾ ಮೋದನಕರಾಃ
ಪ್ರಪದ್ಯೇ ತಂ ರಾಮಾನುಜಯತಿಮಣಿಂ ವೈಷ್ಣವನಿಧಿಂ ||6||
ಮನೀಷಾ ಯದೀಯಾ ಶ್ರುತೀನಾಂ ವಿಭೂಷಾಃ
ವಿಶೇಷಾಯ ಕಾಷಾಯವೇಷೋ ಯದೀಯಃ |
ವಿಧೂತಾಸ್ಸಮಸ್ತೇಷಣಾ ಯೇನ ನಿತ್ಯಂ
ಶ್ರಯೇsಹಂ ದಯಾಳುಂ ಮುನಿಂ ಲಕ್ಷ್ಮಣಂ ತಂ ||7||
ಪಂಚಶಾಖಭಾಸುರತ್ರಿದಂಡ ಉಲ್ಲಸಚ್ಛಿಖಃ
ಬ್ರಹ್ಮಸೂತ್ರಭೂಷಿತಃ ಕಷಾಯರಕ್ತವಸ್ತ್ರಧೃತ್ |
ವೈಷ್ಣವಂ ಪದಂ ಸುಖೇನ ಲಂಭಯನ್ ಜನಾನ್ ಸ್ವಯಂ
ವಿಷ್ಟಪೇ ಯ ಏಧತೇ ಭಜಾಮಿ ತಂ ಮುನೀಶ್ವರಂ ||8||
ವೇದಾಂತಸಾರಮತುಲಂ ನಿಗಮಾಂತದೀಪಂ
ನಿರ್ದೋಷಮದ್ಭುತಮನುತ್ತಮಭಾವಭೂಷಂ |
ಶ್ರೀಭಾಷ್ಯಮನ್ಯನುತನಿತ್ಯಮತೀವ ಹೃದ್ಯಂ
ವೈಕುಂಠರಂಗಶರಣಾಗತಿ ಪೂರ್ವಗದ್ಯಂ ||9||
ವೇದಾರ್ಥಸಂಗ್ರಹಮಥೋ ಭಗವನ್ಮುಖೋತ್ಥ-
ಗೀತಾರ್ಥವರ್ಣನಪರಂ ಪರಮಂ ಚ ಭಾಷ್ಯಂ |
ಚಕ್ರೇ ಕೃತೀರ್ನವ ಹಿ ತಾ ಇತಿ ಯಸ್ತಮಾಹುಃ
ರಾಮಾನುಜಂ ಗುರುವರಂ ಶರಣಂ ಪ್ರಪದ್ಯೇ ||10||
ಕಪ್ಯಾಸ ಮಿತ್ಯಕೃತಕೋಕ್ತಿಶಿರೋವಿರಾಜಿ-
ವಾಕ್ಯಸ್ಯ ಯಾದವಗುರೂಕ್ತ ಮನರ್ಥಮರ್ಥಂ |
ಕಾಪೇಯಪೃಷ್ಟಸದೃಶೇ ನಯನೇ ವಿಭೋರಿ-
ತ್ಯಾಕರ್ಣ್ಯ ಯಶ್ಯುಚಮಗಾತ್ತಮಹಂ ಪ್ರಪದ್ಯೇ ||11||
ಕಪ್ಯಾಸವಾಕ್ಯಸಹಜಾರ್ಥವಿಬೋಧನಾಯ
ವಿದ್ಯೋತಮಾನರಸಪುಷ್ಟಿಮುದಾತ್ತಭಾವಂ |
ವ್ಯಾಖ್ಯಾಯ ತಂ ಬುಧಮನೋಹರಮರ್ಥಮಾಶು
ಯೋsಭೂತ್ ಗುರೋರಪಿ ಗುರುಸ್ತಮಹಂ ಪ್ರಪದ್ಯೇ ||12||
ಕಮಿತಿ ಸಲಿಲ ಮೇತತ್ ಯಃಪಿಬತ್ಯರ್ಯಮಾ ಸಃ
ಕಪಿರಿತಿ ಕಥಿತಸ್ತೇನಾಸ್ಯತೇ ಯತ್ ತದಬ್ಜಂ |
ವಿಕಸಿತಕಮಲಾಭೇ ಪದ್ಮನಾಭಸ್ಯ ನೇತ್ರೇ
ಭವತ ಇತಿ ಯ ಊಚೇ ತಂ ಯತೀಂದ್ರಂ ಪ್ರಪದ್ಯೇ ||13||
ಕಂ ಪ್ಯಾಸಂ ಯಸ್ಯ ತಚ್ಚೇತ್ಯಕಥಿ ಕಮಲ-
ಮಿತ್ಯರ್ಥಮಾದಾಯ ತದ್ವತ್
ಸ್ಯಾತಾಂ ನೇತ್ರೇ ಯದೀಯೇ ಸ ಭವತಿ ಕಮಲಾ-
ಕ್ಷಾನ್ನ ಚಾನ್ಯೋ ಮುಕುಂದಾತ್ |
ಏವಂ ರಮ್ಯಾರ್ಥವತ್ತ್ವೇ ಪ್ಯನುಚಿತಕಥನೈ-
ರ್ಯೇನ ಯೋ ನಿರ್ಜಿತಸ್ತಂ
ಯೋಗೀಶಾನಂ ಪ್ರಪದ್ಯೇ ಭಗವದುರುಕೃಪಾ-
ಪಾತ್ರರಾಮಾನುಜಾರ್ಯಂ ||14||
ಕಾಂಚೀಮಂಡಲವಲ್ಲಭಸ್ಯ ದುಹಿತಾ ಸಂಪೀಡಿತಾ ರಕ್ಷಸಾ
ಬ್ರಾಹ್ಮೇನೇತ್ಯವಗತ್ಯ ಯಾದವಗುರೂ ರಾಜ್ಞಾ ಸಮಾಕಾರಿತಃ |
ಗತ್ವಾ ತೇನ ವಿಲೋಕಿತೇ ಗುರುರಯಂ ನಾಲಂ ಮದುತ್ಸಾರಣಾ-
ಯೇತ್ಯಾಕ್ರುಶ್ಯ ತಿರಶ್ಚಕಾರ ವಿಬುಧ ತ್ವಂ ಯಾಹಿ ಶಿಷ್ಯಸ್ತು ತೇ ||15||
ಶಕ್ತೋ ಮಾಂ ಪ್ರತಿರೋದ್ಧುಮದ್ಯ ಬುಧರಾಟ್ ಯೋ ಬ್ರಾಹ್ಮಣಸ್ತತ್ವತಃ
ತ್ವಂ ಪೂರ್ವಂ ವೃಷಶೈಲಮಾರ್ಗಗಜನೋಚ್ಛಿಷ್ಟಾನ್ನಭುಕ್ತೇರ್ನನು |
ಗುಧಾರೂಪಮಪಾಸ್ಯ ವಿಪ್ರಜನುಷಂ ಪ್ರಾಪ್ತೋsಸಿ ವಿದ್ವಾನಿಹೇ -
ತ್ಯುಕ್ತ್ವಾ ಮೂರ್ಧ್ನಿ ಯದೀಯಪಾದಕಮಲನ್ಯಾಸಾದ್ಧಿ ಧನ್ಯಾ ಕೃತಾ ||16||
ಯತ್ಪಾದಾಂಬುಜಧಾರಣಾಚ್ಛಿರಸಿ ಸಾ ರಾಜ್ಞಸ್ಸುತಾ ರಕ್ಷಸಃ
ನಿರ್ಮುಕ್ತಾ ಸುಖಮೇಧತೇ ಸ್ಮ ಮಹಿಮಾ ರಾಮಾನುಜಾರ್ಯಸ್ಯ ಚ |
ಕಾಂಚೀಭೂಷಣಹಸ್ತಿಶೈಲವಿಲಸದ್ದೇವಾಧಿರಾಜಾಲಯೇ
ಯಃ ಕಾಲಂ ಶ್ರಿತಶಿಷ್ಯಭೋಧನವಿಧೌ ನಿನ್ಯೇ ಗುರುಂ ತಂ ಭಜೇ ||17||
ಯಸ್ಸಾಕ್ಷಾತ್ಕೃತಕೃಷ್ಣದರ್ಶಿತಮಹಾನಿಕ್ಷೇಪವಿದ್ಯಾಂ ಹಿತಾಂ
ಸಂವಾದಾಕೃತಿಮಾತ್ತಗದ್ಯವಪುಷಂ ಸರ್ವೋಪಭೋಗ್ಯಾಂ ಮುದಾ |
ಕೃತ್ವೋಜ್ಜೀವನಮಾತ್ಮನಾಂ ಚ ವಿದಧೇ ನಿರ್ಮತ್ಸರೋ ನಿರ್ಮಮಃ
ತಂ ಯೋಗೀಶಮುದಾತ್ತಭಾವಮನಘಂ ಭಕ್ತ್ಯಾ ಭಜೇ ಲಕ್ಷ್ಮಣಂ ||18||
ಅಪಸರತಿ ಭಯಂ ಯನ್ನಾಮಸಂಕೀರ್ತನಾದ್ಯೈಃ
ವಿಲಸತಿ ಪರತತ್ವಂ ಯದ್ವಚೋಭಿಶ್ಚ ಗೂಢಂ |
ವಿಮತತಿಮಿರಭಾನುರ್ವೇದಚೂಡಾಸುಧಾಂಶುಃ
ವಿಹರತು ಸ ಯತೀಂದ್ರೋ ಮಾನಸಾಬ್ಜೇ ಮಹೀಯೇ ||19||
ಸಿದ್ಧಾಂತಾರ್ಥಪ್ರವಚನಪಥಂ ಯಾತಿ ರಾಮಾನುಜಾರ್ಯೇ
ಹ್ಯಾಮ್ನಾಯಾನಾಂ ಕ್ವಚಿದಪಿ ನ ತು ಸ್ವಾರ್ಥಹಾನೇಃ ಪ್ರಸಕ್ತಿಃ |
ಪ್ರತ್ಯಕ್ಷಾದಿಃ ಪ್ರಭವತಿ ನಿಜಾರ್ಥೇಷು ನಿರ್ವೈರಿಚಾರೀ
ಸ್ಮಾರಂ ಸ್ಮಾರಂ ತದುದಿತಗಿರಸ್ಸಂಶ್ರಯೇ ತತ್ಪದಾಬ್ಜೇ ||20||
ಕಾಣಾದೈರ್ಭುವಿ ವಾದಿಭಿರ್ದುರುದಯೈಶ್ಯಾಕ್ಯೈಶ್ಚ ಪಾಷಂಡಿಭಿಃ
ನಿಶ್ಯೇಷಂ ಚ ವಿಲೋಪಿತಶ್ಯ್ರುತಿಗತೋ ಧರ್ಮೋsಭವತ್ ಸರ್ವತಃ |
ತಾದೃಗ್ಧರ್ಮಮರಂ ತ್ರಿದಂಡಮಹಿತೋ ಯೋಗೀಂದ್ರರೂಪೀ ಹರಿಃ
ಯಸ್ಸಂರಕ್ಷಿತವಾನಯಂ ಸ ಇತಿ ಯಾಂ ಕೀರ್ತಿಂ ದಧೌ ತಂ ಭಜೇ ||21||
ಶ್ರೀರಂಗವಾಸರಸಿಕೋ ಮುನಿಯಾಮುನಾರ್ಯಃ
ಶ್ರುತ್ವಾ ಯದೀಯಭಗವದ್ಗತಭಕ್ತಿಮುಖ್ಯಾನ್ |
ಶ್ರೇಷ್ಠಾನ್ ಗುಣಾನ್ ಕಿಮಪಿ ಕರ್ತುಮಿಯೇಷ ಯಸ್ಮಿನ್
ತಂ ಸದ್ಗುಣಾರ್ಣವ ಮುದಾರಧಿಯಂ ಪ್ರಪದ್ಯೇ ||22||
ಅಯಂ ಮಹಾತ್ಮಾ ಯದಿ ದರ್ಶನೇsಸ್ಮಿನ್
ಪ್ರವೇಶಿತ ಸ್ಸ್ಯಾತ್ ಪ್ರಥಿತೋ ಭವಿಷ್ಯತಿ |
ಇತ್ಯೂಚಿವಾನ್ ಯಂ ಪ್ರತಿ ಯಾಮುನಾರ್ಯಃ
ರಾಮಾನುಜಂ ತಂ ಶರಣಂ ವ್ರಜಾಮಿ ||23||
ಶಾಸ್ತ್ರಾಂತರಾಧ್ಯಯನಕಾಲಸಮಾಪ್ತಿಮೇವ
ಶ್ರೀಯಾಮುನೇ ಗುರುವರಸ್ಯ ನಿರೀಕ್ಷಮಾಣೇ |
ವಿಜ್ಞಾಯ ಸನ್ನಿಹಿತ ಮಾತ್ಮವಿಮುಕ್ತಿಕಾಲಂ
ಹ್ಯಾನಾಯಯತ್ ಯಮನಿಶಂ ತಮಹಂ ಪ್ರಪದ್ಯೇ ||24||
ಸಂಪ್ರಾಪ್ತೇ ಚರಮಾಂ ದಶಾಂ ಮುನಿವರೇ ಶ್ರೀಯಾಮುನಾರ್ಯೇ ತದಾ
ತಸ್ಯಾಕುಂಚಿತಮಂಗುಲಿತ್ರಯಮಥೋ ನಿರ್ವರ್ಣ್ಯ ತತ್ಕಾರಣಂ |
ಜ್ಞಾತ್ವಾ ಯೋಗಿಕೃಪಾವಶಾತ್ತದಖಿಲಂ ಕುರ್ವೇsಹಮಿತ್ಯಾಶ್ರುತೇ
ಯೇನೈವಾರ್ಜವಮಾಪ ತತ್ ಸಪದಿ ತಂ ರಾಮಾನುಜಂ ಸಂಶ್ರಯೇ ||25||
ನೀತ್ವಾ ಮೂಕಂ ಕದಾಚಿತ್ ಕಮಪಿ ನಿಜಗೃಹಂ
ಬಂಧಯಿತ್ವಾsರರಂ ಚ
ಸ್ವೀಯಾಂಘ್ರಿಸ್ಪರ್ಶಸಂಜ್ಞಾಂ ದಿಶತಿ ಯತಿಪತೌ
ಸೋsಪಿ ಚಕ್ರೇ ತಥೈವ |
ದೃಷ್ ಟ್ವೇದಂ ಕೂರನಾಥೋ-
sಪ್ಯಮನುತ ನ ಕುತೋsವಾಗಭೂವಂ ಕಿಮರ್ಥಂ
ಶಾಸ್ತ್ರಾಭ್ಯಾಸೋsನ್ಯಥಾ ಸ್ಯಾತ್ ಮಯಿ ಗುರುಕರುಣೇ-
ತ್ಯಾಶ್ರಯೇ ತಂ ಮುನೀಂದ್ರಂ ||26||
ಸಾಲಗ್ರಾಮನಿವಾಸಿನ ಸ್ಸ್ವವಿಷಯೇ ಪ್ರಚ್ಛನ್ನವಿದ್ವೇಷಿಣಃ
ಸಂತ್ಯತ್ರಾದರತೋ ನ ಚೇತಿ ವಿದಿತಶ್ಯಿಷ್ಯಾಯ ಯೋಗೀ ತದಾ |
ತೀರ್ಥೇ ನ್ಯಸ್ಯ ಪದೌ ಸದೋಪವಿಶತಾದಿತ್ಯಾಹ ಸೋsಪ್ಯಾಚರತ್
ತತ್ಪಾದಾಂಬುನಿಷೇವಣಾತ್ ಸುಚರಿತಾ ಯಂ ಚಾಶ್ರಿತಾಸ್ತಂ ಭಜೇ ||27||
ಭೂಪೋ ವಿಠ್ಠಲದೇವ ಆತ್ಮತನಯಾ ದುಷ್ಟಗ್ರಹೋತ್ಪೀಡಿತಾ
ನಿರ್ವಾಸಾಶ್ಚರತೀತಿ ಖಿನ್ನಹೃದಯಶ್ಯ್ರುತ್ವಾ ಪ್ರಭಾವಂ ಗುರೋಃ |
ಯಸ್ಯಾನುಗ್ರಹತೋ ಗತಗ್ರಹಮತಿಭ್ರಾಂತಿಂ ವಿಲೋಕ್ಯಾತ್ಮಜಾಂ
ತುಷ್ಟಾವ ಸ್ವಯಮಪ್ಯವಾಪ ಶರಣಂ ತಂ ಸಂಯಮೀಂದ್ರಂ ಭಜೇ ||28||
ಭೂಮಿಪಾಯ ವಿಷ್ಣುವರ್ಧನೇತಿ ನಾಮ್ನಿ ಧಾರಿತೇ
ಗರ್ವಿತಾ ಜಿನಾನುಗಾ ಯಯುರ್ಗುರುಂ ತದೋಚಿರೇ |
ಭೋ ವಿಜಿತ್ಯ ನೋ ನ ಕಿಂ ಸ್ವಕೀಯಮೇಮೀಪ್ಸಸೀ -
ತ್ಯಾಶು ತಾನ್ ಸ್ವಸೇವಿನೋ ವ್ಯಧಾತ್ತಮಾಶ್ರಯೇ ಮುನಿಂ ||29||
ಬಹುಗುಣಬಹುಧಾನ್ಯೇ ಭಾನುಖೇಳಾಶಕಾಬ್ದೇ
ಮಕರಸಿತಚತುರ್ದಶ್ಯಹ್ನಿ ತಾರೇsದಿತೇಶ್ಚ |
ಯದುಗಿರಿಶುಭದೀಪೋ ದರ್ಶನೇಚ್ಛಾನುರೂಪಃ
ನಯನಗತ ಉಪಾಸೇ ಯಸ್ಯ ನಾರಾಯಣಸ್ತಂ ||30||
ಶ್ರೀಪಾಂಚರಾತ್ರಗತಸಾತ್ವತಸಂಹಿತೋಕ್ತ-
ಸಂಪ್ರೋಕ್ಷಣಂ ಶುಭಕರಂ ಕಮಲೇಕ್ಷಣಾಯ |
ಶ್ರೀರಂಗರಾಜಕರನೀರಜತಃ ಪ್ರಹೃಷ್ಟಃ
ಯೋsಕಾರಯತ್ತಮನಿಶಂ ಶರಣಂ ಪ್ರಪದ್ಯೇ ||31||
ಯೋsಭವತ್ತದೋತ್ಸವಾರ್ಥಬೇರಶೋಕಭಾಕ್ತತಃ
ಸ್ವಪ್ನಲಬ್ಧತತ್ಪ್ರವೃತ್ಯುಪಾರ್ಜಿತಾತ್ಮವಿಗ್ರಹಃ |
ನಿತ್ಯಪಕ್ಷಮಾಸವತ್ಸರೋತ್ಸವೋತ್ಸುಕಾಗ್ರಣೀಃ
ತಾನಕಾರಯನ್ಮುದಾ ಸದಾ ತಮಾಶ್ರಯೇ ಗುರುಂ ||32||
ಡಿಲ್ಲೀನಾಥ ತವಾದರೇಣ ಮುದಿತೋ ಜಾನೀಹಿ ಮಾಮರ್ಥಿನಂ
ಯಲ್ಲೀಲಾರ್ಥಮುಪಾಗತೋsತ್ರ ರಮತೇ ರಾಮಪ್ರಿಯೋ ಮತ್ಪ್ರಿಯಃ |
ಅತ್ರತ್ಯೇಷು ವಿಚಿನ್ವತಾಂ ಕತಮ ಇತ್ಯಾವೇದಿತೇ ಪಶ್ಯತಃ
ಯಸ್ಯಾಂಕೇ ಸ್ವಯಮಾಗತ ಸ್ಸಮಲಸತ್ತಂ ದೇವಮಾಭಾವಯೇ ||33||
ಪುಲಕಿತನಿಖಿಲಾಂಗ ಸ್ತೋಷಿತಾತ್ಮಾಂತರಂಗಃ
ಯತಿಪತಿರವದತ್ ತ್ವಂ ಸಂಪದಾಂ ಮೇ ಕುಮಾರಃ |
ಕ್ಷಿತಿಪತಿರಪಿ ದೃಷ್ಟ್ವಾ ತತ್ ಪ್ರಹೃಷ್ಟಃ ಪ್ರಪೇದೇ
ಶರಣ ಮನುಪದಂ ತಂ ಯಾಮಿ ರಾಮಾನುಜಾರ್ಯಂ ||34||
ರಾಮಪ್ರಿಯೋsಸೌ ಯತಿರಾಜಪುತ್ರಃ
ಸಂಪತ್ಕುಮಾರಃ ಪುರುಷೋತ್ತಮೋsಭೂತ್ |
ಯದ್ಯೋಗತೋ ಭಾಗ್ಯಮಿಯಾಯ ಶೈಲಃ
ಪ್ರಖ್ಯಾತ ಇತ್ಯಾಹುರಹಂ ತಮೀಡೇ ||35||
ಅನೀಯಾಸ್ಯಾಪಿ ಸತ್ಯಾದಿಹ ಸನಕಮುಖೇ-
ನೇತಿ ನಾರಾಯಣಾದ್ರಿಃ
ದತ್ತಾತ್ರೇಯೇಣ ವೇದಾ ಇಹ ಪರಿಪಠಿತಾ
ಇತ್ಯಸೌ ವೇದಶೈಲಃ |
ರಾಮಃ ಕೃಷ್ಣೋsರ್ಚಿತಸ್ಸ್ಮೇತ್ಯತಿಶಯಿತಯಶಾ
ಯಾದವಾದ್ರಿ ಸ್ತೃತೀಯೇ
ಭೂಯಸ್ತುರ್ಯೇ ಯುಗೇsಸ್ಮಿನ್ ಯತಿಪತಿಪುನರು-
ಜ್ಜೀವನಾದ್ಯೋಗಿಶೈಲಃ ||36||
ನಾರಾಯಣೋ ಯನ್ಮಹಿಮಾನಮಾದರಾತ್
ಪ್ರಕಾಶಯತ್ಯುತ್ಸವವೇರಮಾಪ್ಯ |
ಸಂಪತ್ಕುಮಾರೋ ಯತಿರಾಜಪುತ್ರಾ-
ಭಿಖ್ಯಾಂ ಯತೋsಗಾಚ್ಚ ಭಜೇ ಗುರುಂ ತಂ ||37||
ಶ್ರೀ ರಾಮಾನುಜ ಮತ್ಪ್ರಿಯಸ್ತ್ವಮಿಹ ತೇ ತ್ವತ್ಪಾದಸೇವಾಜುಷಾಂ
ತ್ವತ್ಸಿದ್ಧಾಂತಜುಷಾಂ ಚ ನಾನ್ಯಸುಲಭಾಂ ಸೌಭಾಗ್ಯದಾಂ ಸರ್ವದಾ |
ಆತ್ಮಿಯೋಭಯಭೂತಿಸಂಪದಮದಾಮಿತ್ಯಾಹ ಯಸ್ಮೈ ಮುದಾ
ಶ್ರೀರಂಗಾಧಿಪತಿಸ್ತಮನ್ವಹಮಹಂ ಶ್ರೇಯೋವಹಂ ಸಂಶ್ರಯೇ ||38||
ಪ್ರಯಾಸ್ಯತ್ಯಾತ್ಮೀಯೈಸ್ಸಹ ಯತಿಪತೌ ವೇಂಕಟಗಿರಿಂ
ಪಯಸ್ಸಾಜೀವೈಕಾ ಸುಕೃತಪರಿಪಾಕಾದುಪಗತಾ |
ದಧಿದ್ರವ್ಯಾರ್ಥಾ ಯತ್ಪದಸಲಿಲಪಾನಾನ್ಮತಿಮತೀ
ಪ್ರಪೇದೇ ಮೋಕ್ಷಾರ್ಥಂ ತಮಹಮನಿಶಂ ಯಾಮಿ ಶರಣಂ ||39||
ಪ್ರದಕ್ಷಿಣತ ಏವ ತಂ ಸಕೃದುಪೇಹಿ ರಾಮಾನುಜಂ
ತ್ರಿದಂಡಕರಮಂಡಿತೋ ಭವತಿ ಯೋಗಿಸೇವ್ಯೋ ಭವಾನ್ |
ಇತಿ ದ್ವಿಪಗಿರೀಶ್ವರೇ ವದತಿ ಯಾದವ ಸ್ಸ್ವಪ್ನತಃ
ಪ್ರಪದ್ಯ ಶುಶುಭೇ ಸ ಯಂ ಮುನಿವರಂ ಭಜೇ ತಂ ಸದಾ ||40||
ವಾದೋsತಿಮೋದಾದ್ವವೃಧೇ ಯತೀಂದ್ರೋಃ
ದಯಾಳುನಾಮ್ನಾ ವಿದುಷಾ ತದಾ ಯಃ |
ನಿರುತ್ತರೋಪ್ಯುಕ್ತಸದುತ್ತರಶ್ಚ
ಜಿಗಾಯ ದೇವಪ್ರಿಯಮಾಶ್ರಯೇ ತಂ ||41||
ಸಂಸ್ತೂಯತಾಂ ಕಿಮಪಿ ಚೇತಿ ಕಿಡಾಂಬಿಯಾರ್ಚ್ಚಾ
ಆಜ್ಞಪ್ತ ಏಕಮಪಠತ್ ಸ್ತುತಿರತ್ನಪದ್ಯಂ
ರಾಮಾನುಜೇ ಸತಿ ಭವಾನಗತಿಃ ಕಥಂ ಸ್ಯಾತ್
ಇತ್ಯಾಹ ಯದ್ವಿಭವಮೀಶಮುಪಾಶ್ರಯೇsಹಂ ||42||
ಅಸಂಖ್ಯಾತಾ ಜೀವಾಃ ಕಥಮಪಿ ನ ಮಾಂ ಯಾಂತಿ ಪತಿತಾಃ
ಕಥಂ ವಾ ಧತ್ಸೇ ತಾನ್ ವಿಶದಯ ವಶೀಕಾರಸರಣಿಂ |
ಇತೀಶಾದಾಪೃಷ್ಟೋ ಗತಭಯ ಉಪಾಯೋಕ್ತಿ ಮನಘಾಂ
ನ್ಯವೇದೀತ್ ಯಸ್ತಾದೃಕ್ಸರಸವಚನಂ ತಂ ಗುರುಮಯೇ ||43||
ಶ್ರೀಮಾನ್ ಶ್ರೀಶಠಕೋಪಸೂರಿರಪಿ ಯಂ ಯೋಗೀಶ್ವರಂ ಭಾವಿನಂ
ನಿರ್ದಿಶ್ಯೈವ ಜಗೌ ಜಗತ್ಯವಿಕಲಾ ಶ್ರೀರ್ವೈಷ್ಣವೀ ವರ್ಧತಾಂ |
ಇತ್ಯೇವಂ ಸ್ವವಚೋಭರೈ ಶ್ಯಮಧನಂ ತಾದೃಗ್ಯಶೋಭಾಸುರಂ
ಸಾಟೋಪಃ ಕಲಿರಪ್ಯಪಾಕೃತ ಯತೋ ರಾಮಾನುಜಂ ತಂ ಭಜೇ ||44||
ಕಾಸಾರಾರೋಹಣಸ್ಥಂ ಪಿಬತಿ ಚ ಚಟಕೋ
ವೀರನಾರಾಯಣೀಯೇ
ವಾರಾಶೌ ತತ್ ಸ್ಥಿತಂ ಚೇಜ್ಜನಪದಮಮೃತಂ
ಪಾಯಯೇದನ್ವಹಂ ಹಿ |
ಇತ್ಥಂ ಶ್ರೀನಾಥಯೋಗೀ ಯದಮಿತಮಹಿಮೋ-
ತ್ಕರ್ಷಮಾವಿಶ್ಚಕಾರ
ಪ್ರಾಜ್ಞಂ ರಾಮಾನುಚಾರ್ಯಂ ಜನಿಭಯಹರಣಂ
ತಂ ಶರಣ್ಯಂ ಪ್ರಪದ್ಯೇ ||45||
ಗೋಷ್ಠೀಪೂರ್ಣೋಪದಿಷ್ಟಂ ಮನುಮನುನಿಲಯಂ
ಪ್ರಾಪ್ಯ ನಾರಾಯಣೀಯಂ
ಗೊಷ್ಠ್ಯಾಮಷ್ಟಾಕ್ಷರಂ ತಂ ಶ್ರುತಿಶತಮಧುರಂ
ಸರ್ವವೇದಾರ್ಥಸಾರಂ |
ಉಚ್ಚೈರುಚ್ಚಾರಯನ್ ಯೋ ನಿಜದುರಿತಫಲಂ
ತ್ವೇಕಭೋಗ್ಯಂ ಹಿ ತತ್ಸ್ಯಾತ್
ಮೋಕ್ಷೋsನೇಕಾತ್ಮಭೋಗ್ಯೋ ಗುರುವರಕೃಪಯೇ-
ತ್ಯಾಹ ತಂ ಸಂಶ್ರಯೇsಹಂ ||46||
ಸೂಕ್ತೇರರ್ಥಸ್ಸನಿಂದಶ್ಯಠಜಿತಭಿಮತೋ
ಯಾಮುನಾರ್ಯಾದೃತಶ್ಚೇ-
ತ್ಯುಕ್ತೇ ಮಾಲಾಧರಾರ್ಯೈರ್ಭಗವತಿ ಭವ-
ದುಕ್ತೋsಯಮರ್ಥೋ ನ ಯುಕ್ತಃ |
ದೇವಸ್ಯೈವೋಪಕಾರಸ್ಮೃತಿಪರ ಉಚಿತೋ
ಹೀತಿ ಸಂದರ್ಭಯೋಗ್ಯಂ
ವ್ಯಾಖ್ಯಾಸ್ಯನ್ ಪುರ್ಣಮಾನ್ಯೋsಭವದತಿಕುಶಲ-
ಸ್ತಂ ಯತೀಂದ್ರಂ ನಮಾಮಿ ||47||
ಪೂರ್ವಾಚಾರ್ಯದಯೈಕವೇದ್ಯವಿಷಯಪ್ರಸ್ತಾವನಾಯಾಂ ಕ್ವಚಿತ್
ಶ್ರೀಮದ್ಯಾಮುನಯೋಗಿನಾಂ ನ ಹಿ ಭವೇತ್ ಪ್ರಾಯೋsಯಮತ್ರಾಶಯಃ |
ಏವಂ ವಾದಿನ ಮಾಹ ಯಾಮುನಮುನಿಂ ಕ್ವೇತ್ಯೈಕ್ಷಥಾಃ ಸ್ರಗ್ಧರಃ
ಸ್ಯಾದೇವಂ ನನು ತಸ್ಯ ಸದ್ಗುರುಮಣೀ ರಸ್ಮ್ಯೇಕಲವ್ಯಃ ಪ್ರಿಯಃ ||48||
ಭಕ್ತಿಪ್ರಸ್ಯಂದಿನೀಂ ತಾಂ ಗಿರಮಭಿದಧತೋ
ವೀಕ್ಷ್ಯ ತೇಜೋವಿಶೇಷಂ
ಶೇಷಂ ಕಾಷಾಯವೇಷಂ ಪುರುಷಮಕಲುಷಂ
ಮನ್ಯಮಾನೋsವತಾರಂ |
ವಿಷ್ಣೋರ್ನತ್ವಾ ಯಮಂತರ್ಬಹುವಿಧಮನುವತ್
ಸ್ವಾತ್ಮಜಂ ಕಾಂತಬಾಹುಂ
ಶಿಷ್ಯಂ ಚಾಕಾರಯತ್ ಯತ್ಪದನಳಿನಯುಗೇ
ತಂ ಭಜೇ ಸಂಯಮೀಂದ್ರಂ ||49||
ಶ್ರೀರಂಗೇಂದೋಶ್ಯ್ರಿಯಂ ತಾಮವಿಲಕಮಹಿತಾಂ
ಯೋಗಿಭೋಗೀ ವಿತೇನೇ
ಶೇಷಾಶೇಷಾತ್ಮದೋಷಪ್ರಮುಷಮಗಜುಷಂ
ಭೂಷಿತಾಶೇಷದೋಷಂ |
ಹಸ್ತೀಶೇಕ್ಷಾವಿಶೇಷಾದಲಭತ ಯತಿರಾ-
ಡ್ವೇಷಮಾತ್ತಪ್ರಭಾವಂ
ಬೇರಂ ಮಾಹಂ ದದೌ ಯೋ ಯದುಗಿರಿಕಮಿತ-
ರ್ನೌಮಿ ರಮಾನುಜ ತಂ ||50||
ಏತಾಂ ಪಂಚಾಶತಂ ಯೇ ಯತಿಪತಿವಿಷಯಾಂ ಶ್ರದ್ಧಯಾ ಸಂಪಠಂತಿ
ಸದ್ವೃತ್ತಾಂ ಸದ್ಗುಣಾಢ್ಯಾಂ ಮುನಿವರಕರುಣಾಪಾತ್ರಗೋಪಾಲಗೀತಂ |
ತೇಭ್ಯೋ ರಾಮಾನುಜಾರ್ಯೋ ವಿತರತಿ ಸುಮತಿಂ ಭಕ್ತಿಮಾತ್ಮೇಪ್ಸಿತಾರ್ಥಂ
ಶುದ್ಧಂ ಜ್ಞಾನಂ ಸ್ಥಿರಂ ಸದ್ಯಶ ಇಹ ಪರತಶ್ಚಾತ್ಮವಿದ್ಯಾಪ್ರಭಾವಂ ||51||
||ಇತಿ ಶ್ರೀರಾಮಾನುಜಪಂಚಾಶತ್ ಸಂಪೂರ್ಣಾ||