ಸ್ಕಂದಪುರಾಣ ಅಧ್ಯಾಯ 3

ಸನತ್ಕುಮಾರ ಉವಾಚ |
ಶೃಣುಷ್ವೇಮಾಂ ಕಥಾಂ ದಿವ್ಯಾಂ ಸರ್ವಪಾಪಪ್ರಣಾಶನೀಮ್ |
ಕಥ್ಯಮಾನಾಂ ಮಯಾ ಚಿತ್ರಾಂ ಬಹ್ವರ್ಥಾಂ ಶ್ರುತಿಸಮ್ಮಿತಾಮ್ |
ಯಾಂ ಶ್ರುತ್ವಾ ಪಾಪಕರ್ಮಾಪಿ ಗಚ್ಛೇಚ್ಛ ಪರಮಾಂ ಗತಿಮ್ ||

ನ ನಾಸ್ತಿಕಾಶ್ರದ್ದಧಾನೇ ಶಠೇ ಚಾಪಿ ಕಥಂಚನ |
ಇಮಾಂ ಕಥಾಮನುಬ್ರೂಯಾತ್ತಥಾ ಚಾಸೂಯಕೇ ನರೇ ||

ಇದಂ ಪುತ್ರಾಯ ಶಿಷ್ಯಾಯ ಧಾರ್ಮಿಕಾಯಾನಸೂಯವೇ |
ಕಥನೀಯಂ ಮಹಾಬ್ರಹ್ಮಂದೇವಭಕ್ತಾಯ ವಾ ಭವೇತ್ |
ಕುಮಾರಭಕ್ತಾಯ ತಥಾ ಶ್ರದ್ದಧಾನಾಯ ಚೈವ ಹಿ ||

ಪುರಾ ಬ್ರಹ್ಮಾ ಪ್ರಜಾಧ್ಯಕ್ಷಃ ಅಂಡೇsಸ್ಮಿನ್ಸಂಪ್ರಸೂಯತೇ |
ಸೋsಜ್ಞಾನಾತ್ಪಿತರಂ ಬ್ರಹ್ಮಾ ನ ವೇದ ತಮಸಾವೃತಃ ||

ಅಹಮೇಕ ಇತಿ ಜ್ಞಾತ್ವಾ ಸರ್ವಾ/ಲ್ಲೋಕಾನವೈಕ್ಷತ |
ನ ಚಾಪಶ್ಯತ ತತ್ರಾನ್ಯಂ ತಪೋಯೋಗಬಲಾನ್ವಿತಃ ||

ಪುತ್ರ ಪುತ್ರೇತಿ ಚಾಪ್ಯುಕ್ತೋ ಬ್ರಹ್ಮಾ ಶರ್ವೇಣ ಧೀಮತಾ |
ಪ್ರಣತಃ ಪ್ರಾಂಜಲಿರ್ಭೂತ್ವಾ ತಮೇವ ಶರಣಂ ಗತಃ ||

ಸ ದತ್ತ್ವಾ ಬ್ರಹ್ಮಣೇ ಶಂಭುಃ ಸ್ರಷ್ರ್ಟತ್ವಂ ಜ್ಞಾನಸಂಹಿತಮ್ |
ವಿಭುತ್ವಂ ಚೈವ ಲೋಕಾನಾಮಂತರ್ಧೇ ಪರಮೇಶ್ವರಃ ||

ತದೇಷೋಪನಿಷತ್ಪ್ರೋಕ್ತಾ ಮಯಾ ವ್ಯಾಸ ಸನಾತನಾ |
ಯಾಂ ಶ್ರುತ್ವಾ ಯೋಗಿನೋ ಧ್ಯಾನಾತ್ಪ್ರಪದ್ಯಂತೇ ಮಹೇಶ್ವರಮ್ ||

ಬ್ರಹ್ಮಂ ಚ ಯೋ ವಿದಧೇ ಪುತ್ರಮಗ್ರೇ ಜ್ಞಾನಂ ಚ ಯಃ ಪ್ರಹಿಣೋತಿ ಸ್ಮ ತಸ್ಮೈ |
ತಮಾತ್ಮಸ್ಥಂ ಯೇsನುಪಶ್ಯಂತಿ ಧೀರಾಸ್ತೇಷಾಂ ||

ಸ ವ್ಯಾಸ ಪಿತರಂ ದೃಷ್ಟ್ವಾ ಸ್ವದೀಪ್ತ್ಯಾ ಪರಯಾ ಯುತಮ್ |
ಪುತ್ರಕಾಮಃ ಪ್ರಜಾಹೇತೋಸ್ತಪಸ್ತೀವ್ರಂ ಚಕಾರ ಹ ||

ಮಹತಾ ಯೋಗತಪಸಾ ಯುಕ್ತಸ್ಯ ಸಮಹಾತ್ಮನಃ |
ಅಚಿರೇಣೈವ ಕಾಲೇನ ಪಿತಾ ಸಂಪ್ರತುತೋಷ ಹ ||

ದರ್ಶನಂ ಜಾಗಮತ್ತಸ್ಯ ವರದೋಸ್ಮೀತ್ಯುವಾಚ ಹ |
ಸ ತುಷ್ಟಾವ ನತೋ ಭೂತ್ವಾ ಕೃತ್ವಾ ಶಿರಸಿ ಚಾಂಜಲಿಮ್ ||

ನಮಃ ಪರಮದೇವಾಯ ದೇವಾನುಮಪಿ ವೇಧಸೇ |
ಸ್ರಷ್ಟ್ರೇವೈ ಲೋಕತಂತ್ರಾಯ ಬ್ರಹ್ಮಣಃ ಪತಯೇ ನಮಃ ||

ಏಕಸ್ಮೈ ಶಕ್ತಿಯುಕ್ತಾಯ ಅಶಕ್ತಿರಹಿತಾಯ ಚ |
ಅನಂತಾಯಾಪ್ರಮೇಯಾಯ ಇಂದ್ರಿಯಾವಿಷಯಾಯ ಚ ||

ವ್ಯಾಪಿನೇ ವ್ಯಾಪ್ತಪೂರ್ವಾಯ ಅಧಿಷ್ಠಾತ್ರೇ ಪ್ರಚೋದಿನೇ |
ಕೃತಪ್ರಚೇತನಾಯೈವ ತತ್ತ್ವವಿನ್ಯಾಸಕಾರಿಣೇ ||

ಪ್ರಧಾನಚೋದಕಾಯೈವ ಗುಣಿನಾಂ ಶಾಂತಿದಾಯ ಚ |
ದೃಷ್ಟಿದಾಯ ಚ ಸರ್ವೇಷಾಂ ಸ್ವಯಂ ವೈ ದರ್ಶನಾಯ ಚ ||

ವಿಷಯಗ್ರಾಹಿಣೇ ಚೈವ ನಿಯಮಸ್ಯ ಚ ಕಾರಿಣೇ |
ಮನಸಃ ಕರಣಾನಾಂ ಚ ತತ್ರೈವ ನಿಯಮಸ್ಯ ಚ ||

ಭೂತಾನಾಂ ಗುಣಕರ್ತ್ರೇ ಚ ಶಕ್ತಿದಾಯ ತಥೈವ ಚ |
ಕರ್ತ್ರೇ ಹ್ಯಂಡಸ್ಯ ಮಹ್ಯಂ ಚ ಅಚಿಂತ್ಯಾಯಾಗ್ರಜಾಯ ಚ |
ಅಪ್ರಮೇಯ ಪಿತರ್ನಿತ್ಯಂ ಪ್ರೀತೋ ನೋ ದಿಶ ಶಕ್ವರೀಮ್ ||

ತಸ್ಯೈವಂ ಸ್ತುವತೋ ವ್ಯಾಸ ದೇವದೇವೋ ಮಹೇಶ್ವರಃ |
ತುಷ್ಟೋsಬ್ರವೀತ್ಸ್ವಯಂ ಪುತ್ರಂ ಬ್ರಹ್ಮಾಣಂ ಪ್ರಣತಂ ತಥಾ ||

ಯಸ್ಮಾತ್ತೇ ವಿದಿತಂ ವತ್ಸ ಸೂಕ್ಷ್ಮಮೇತನ್ಮಹಾದ್ಯುತೇ |
ತಸ್ಮಾದ್ಬ್ರಹ್ಮೇತಿ ಲೋಕೇಷು ನಾಮ್ನಾ ಖ್ಯಾತಿಂ ಗಮಿಷ್ಯಸಿ ||

ಯಸ್ಮಾಚ್ಚಾಹಂ ಪಿತೇತ್ಯುಕ್ತಸ್ತ್ವಯಾ ಬುದ್ಧಿಮತಾಂ ವರ |
ತಸ್ಮಾತ್ಪಿತಾಮಹತ್ವಂ ತೇ ಲೋಕೇ ಖ್ಯಾತಿಂ ಗಮಿಷ್ಯತಿ ||

ಪ್ರಜಾರ್ಥಂ ಯಚ್ಚ ತೇ ತಪ್ತಂ ತಪ ಉಗ್ರಂ ಸುದುಶ್ಚರಮ್ |
ತಸ್ಮಾತ್ಪ್ರಜಾಪತಿತ್ವಂ ತೇ ದದಾನಿ ಪ್ರಯತಾತ್ಮನೇ ||

ಏವಮುಕ್ತ್ವಾ ಸ ದೇವೇಶೋ ಮೂರ್ತಿಮತ್ಯೋsಸೃಜತ್‌ಸ್ತ್ರಿಯಃ |
ಯಾಸ್ತಾಃ ಪ್ರಕೃತಯಸ್ತ್ವಷ್ಟೌ ವಿಶೇಷಾಶ್ಚೇಂದ್ರಿಯೈಃ ಸಹ |
ಭಾವಾಶ್ಚ ಸರ್ವೇ ತೇ ದೇವಮುಪತಸ್ಥುಃ ಸ್ವರೂಪಿಣಃ ||

ತಾನುವಾಚ ತತೋ ದೇವಃ ಪತಿರ್ಯುಕ್ತಃ ಸ್ವತೇಜಸಾ |
ಏತಮದ್ಯಾಭಿಷೇಕೇಣ ಸಂಪಾದಯತ ಮಾ ಚಿರಮ್ ||

ತಾಭಿಃ ಸ್ವಂ ಸ್ವಂ ಸಮಾದಾಯ ಭಾವಂ ದಿವ್ಯಮತರ್ಕಿತಮ್ |
ಅಭಿಷಿಕ್ತೋ ಬಭೂವೇತಿ ಪ್ರಜಾಪತಿರತಿದ್ಯುತಿಃ ||

ತತ್ರೈವಂ ಯೋಗಿನಃ ಸೂಕ್ಷ್ಮಂ ದೃಷ್ಟ್ವಾ ದಿವ್ಯೇನ ಚಕ್ಷುಷಾ |
ಪುರಾಣಂ ಯೋಗತತ್ತ್ವಜ್ಞಾ ಗಾಯಂತಿ ತ್ರಿಗುಣಾನ್ವಿತಮ್ ||

ರುದ್ರಃ ಸ್ರಷ್ಟಾ ಹಿ ಸರ್ವೇಷಾಂ ಭೂತಾನಾಂ ತವ ಚ ಪ್ರಭೋ |
ಅಸ್ಮಾಭಿಶ್ಚ ಭವಾನ್ಸಾರ್ಧಂ ಜಗತಃ ಸಂಪ್ರವರ್ತಕಃ ||

ಸ ದೇವಸ್ತೋಷಿತಃ ಸಮ್ಯಕ್ಪರಮೈಶ್ಚರ್ಯಯೋಗಧೃಕ್ |
ಬ್ರಹ್ಮಾಣಮಗ್ರಜಂ ಪುತ್ರಂ ಪ್ರಾಜಾಪತ್ಯೇಭ್ಯಷೇಚಯತ್ ||

ಯಃ ಕೃತ್ವಾ ಬಹುವಿಧಮಾರ್ಗಯೋಗಯುಕ್ತಂ ತತ್ತ್ವಾಖ್ಯಂ  ಜಗದಿದಮಾದರಾದ್ಯುಯೋಜ |
ದೇವಾನಾಂ ಪರಮಮನಂತಯೋಗಯುಕ್ತಂ ಮಾಯಾಭಿಸ್ತ್ರಿಭುವನಮಂಧಮಪ್ರಸಾದಮ್ ||

ಸರ್ವೇಷಾಂ ಮನಸಿ ಸದಾವತಿಷ್ಠಮಾನೋ ಜಾನಾನಃ ಶುಭಮಶುಭಂ ಚ ಭೂತನಾಥಃ |
ತಂ ದೇವಂ ಪ್ರಮಥಪತಿಂ ಪ್ರಣಮ್ಯ ಭಕ್ತ್ಯಾ ನಿತ್ಯಂ ವೈ ಶರಣಮುಪೈಮಿ ಸೂಕ್ಷ್ಮಸೂಕ್ಷ್ಮಮ್ ||

ಇತಿ ಸ್ಕಂದಪುರಾಣೇ ತೃತೀಯೋsಧ್ಯಾಯಃ ||